Nafn: Jónína Erna Arnardóttir

Fjölskylduhagir/búseta: Bý í Borgarnesi, gift Vífli Karlssyni, á tvö uppkomin börn og þrjú barnabörn.

Starfsheiti/fyrirtæki: Píanóleikari og tónlistarkennari.

Áhugamál: Tónlist og gönguferðir úti í náttúrunni.

Dagurinn: Fimmtudagurinn 5. október.

Klukkan hvað vaknaðir þú og hvað var það fyrsta sem þú gerðir? Vaknaði upp úr átta og fór í morgunverkin á baðherberginu.

Hvað borðaðirðu í morgunmat? Cheerios og kaffi (ekki samtímis!)

Hvenær fórstu til vinnu og hvernig? Fór í vinnuna rétt fyrir 10:00, gangandi.

Fyrstu verk í vinnunni? Gera stofu klára fyrir fyrsta nemanda dagsins.

Hvað varstu að gera klukkan 10? Hitti nemanda sem er að undirbúa að senda inn upptöku fyrir Frosen söngleikinn og aðstoðaði hana við að æfa.

Hvað gerðirðu í hádeginu? Þá var ég að æfa fjórhent prógramm fyrir tónleika sem ég og norskur félagi minn munum halda í næstu viku í Minneapolis og New York. Við vorum að æfa í Tónlistarskólanum í Borgarnesi en svo bilaði ljós og stofan fylltist af reyk. Sem betur fer fór allt vel, en við ákváðum að taka hádegispásu eftir þá uppákomu!

Hvað varstu að gera klukkan 14? Þá vorum við aftur farin að æfa, en heima hjá mér.

Hvenær hætt og það síðasta sem þú gerðir í vinnunni? Hætti kl. 18:30 en þá var ég komin í vinnuna mína í Tónlistarskólanum á Akranesi og spilaði með söngnemendum fjölbreytta tónlist, við enduðum síðasta tímann á Alt under himmelens feste, dásamlegt sænskt lag.

Hvað gerðirðu eftir vinnu? Keyrði í Borgarnes og hlustaði á sögu á meðan ég keyrði.

Hvað var í kvöldmat og hver eldaði? Það var snarl; skyr, egg, brauð og salat úr garðinum.

Hvernig var kvöldið? Fór á Barafest úti í Brákarey, þar var gleðin við völd, enda var í upphafi kvöldsins gjörningur þar sem leiðindin voru jörðuð. Svo tók ég þátt í tónlistarflutningi með Drengjakór Barabars en ég hef verið svo heppin að fá að vera með þeim og hef starfstitilinn Forseti.

Hvenær fórstu að sofa? Í kringum miðnættið.

Hvað var það síðasta sem þú gerðir áður en þú fórst að hátta? Stilla vekjaraklukkuna.

Hvað stendur upp úr eftir daginn? Hvað hann var skemmtilegur og fjölbreyttur.

Eitthvað að lokum? Það er gaman hvað það er til mikið af skemmtilegu fólki og fallegri tónlist.

Dagur í lífi píanóleikara og tónlistarkennara