medium

large

thumbnail

1536x1536

2048x2048

small

custom-size

Gert klárt fyrir Hafnarfjall Ultra utanvegahlaupið

Á fjórða hundrað ungmenna hittast á Snæfellsnesi

Samþykktu kaup á nýjum dælubíl

Aukafjárveiting til neyðarviðgerða í vegamálum óafgreidd hjá Alþingi

Úrtaka Dreyra fyrir Fjórðungsmót

Þreklausir Skagamenn

Nafn: Ríkharður Mýrdal Harðarson



Starfsheiti/fyrirtæki: Matreiðslumeistari N1-Hyrnan Borgarnesi



Fjölskylduhagir/búseta: giftur Evu Láru Vilhjálmsdóttur og eigum við saman þrjú börn; Vilhjálm Inga, Aletu Von Mýrdal og Amöndu Nótt Mýrdal og svo á ég fyrir Alexander Jarl, Gabríelu Sól og Mikael Aron.



Áhugamál: tónlist bæði að semja, spila og hlusta. Ég spila og glamra á nokkur hljóðfæri og er með heimastúdíó og gaf út plötu fyrir nokkrum árum með eigin lögum sem heitir Paradísarlaut og er á Spotify. Svo hef ég gaman að því að smíða og búa til hluti og fer stundum á Bjössaróló og laga og endursmíða leiktæki í anda Bjössa. Svo eru andleg mál mér hugleikin. Og svo reyni ég að mæta reglulega í lyftingasalinn en mætti vera duglegri að mæta þangað er það stendur til bóta. Og hin og þessi áhugamál.



Vinnudagurinn: Ég vinn frá kl. 8 til 16 virka daga vikunar og þessi var ekki undantekning.



Mætt til vinnu og fyrsta verk? Fyrsta verk er að kveikja á eldavélinni og setja vatn í potta fyrir súpu dagsins og sósu, baka brauð með súpunni og að undirbúa hádegismatinn sem er að mestu venjulegur heimilismatur fyrir flesta verktaka, fyrirtæki og ferðamenn.



Klukkan 10? Þá er að setja lambalærið í ofninn. Brúna kartöflurnar og klára súpuna og sósuna og all meðlætið með réttinum og prenta út matseðilinn og setja á FB fyrir kúnnana svo þeir geti ákveðið hvar þeir ætli að borða í hádeginu enda margir veitingastaðir í Borgarnesi.



Í hádeginu? Þá byrjar törnin. Það gætu komið 70 til 100 manns í rétt dagsins. Þennan dag var ég með lambalæri með brúnuðum kartöflum, grænum baunum, rabbarbarasultu og rauðkáli og svo fylgir súpa dagsins með og kaffi. Þessi réttur er alltaf vinsæll og allir starfsmenn í grilli og afgreiðslu setja í fimmta gírinn svo að allt fái rétt dagsins á mettíma; vel útilátið fyrir vinnandi fólk. Svo erum við líka á fullu í grillinu; hamborgara, pizzur, kjúklingabita og fleira. Allt verður að ganga hratt og vel fyrir sig og þá er frábært að hafa allan þennan frábæra mannskap sem starfar á N1.



Um miðjan dag eða nánar tiltekið klukkan 15? Þá er að taka á móti vörum, panta vörur og undirbúa næsta dag.



Síðasta verkið? Tékka á öllu fyrir næsta dag hvort allt sé komið svo að næsti dagur geti gengið eins og ég vil að hann gangi! Að allir gestirnir og verktakarnir fái góðan og vel útilátinn rétt dagsins á mettíma.



Fastir liðir alla daga? Panta hráefni fyrir grill og eldhús, að alltaf sé hreint og fínt, vera hress og jákvæður, hafa húmorinn uppi og vera kurteis við starfsfólk og viðskiptavini.



Hvað stendur upp úr eftir vinnudaginn? Að vinna með öllu þessu starfsfólki sem kemur frá mörgum löndum og að allt hafi gengið að mestu vel og að verktakarnir hafi verið sæmilega ánægðir með matinn og vilji koma aftur á morgun og hinn.



Var dagurinn hefðbundinn? Já, allt gekk vel, um 90 manns mætu í lambalærið og sveppasúpuna. Hyrnan N1 klikkar ekki!



Hvenær byrjaðir þú í þessu starfi? Er þetta framtíðarstarfið þitt? Já, ég er búinn að vera í Hyrnunni með annan fótinn síðan 1997 en var í hléum að vinna á settinu í Latabæ við gerð þáttana hjá Magga vini mínum. Það var mikið ævintýri. En ég geri ráð fyrir að halda áfram á N1 Hyrnunni meðan ég hef enn gaman af því og verktakarnir mæti í réttinn og atvinnurekandinn vilji hafa mig áfram.



Hlakkar þú til að mæta í vinnuna?  Já, ég mæti alla daga með bros á vör.



Eitthvað að lokum? Það eru allir vegir færir og draumar geta ræst. Draumar geta ræst og þeir rætast oftast en maður verður að vinna að þeim markmiðum sem í draumum felast. Hamingjan býr í litlu hlutunum. Maður verður að veita þeim athygli og gefa þeim pláss í hjartanu, þar blómstra þeir ef maður vökvar þá með auðmýkt, þakklæti og væntumþykju. Hamingjan fyllir út í vitundina og geri mann að betri persónu. Batnandi mönnum er best að lifa.

Dagur í lífi matreiðslumeistara