Nafn: Ragnheiður Valdimarsdóttir, en er kölluð Ragga.

Fjölskylduhagir/búseta: Fjölskyldan býr í Stykkishólmi, bænum við eyjarnar. Magnús maðurinn minn, börnin tvö Guðrún og Sigurður og kanínan Mómó. Við fluttum í Stykkishólm fyrir 25 árum því betri helmingurinn fékk vinnu sem Minjavörður Vesturlands og Vestfjarða. Minjavarðarstarfið var nýtt og spennandi starf sem dró okkur til landsins aftur frá Danmörku þar sem ég hafði stundað nám í Náttúrufræðilegri forvörslu.

Starfsheiti/fyrirtæki: Starfa sem fulltrúi í Ráðhúsinu hjá Sveitarfélaginu Stykkishólmi. Starfið er mjög skemmtilegt og fjölbreytt, í raun enginn dagur eins. Er mjög heppin með samstarfsmenn og er í miklum samskiptum við flesta forstöðumenn stofnana og aðra sem eiga erindi í Ráðhúsið.

Áhugamál: Finnst skemmtilegt að ferðast bæði innanlands og utan. Skoða nýja staði og heimsækja aftur staði sem ég hef komið á áður. Fór til Noregs í fyrra vegna boðs á tónleika með Peter Gabriel og ferðaðist um og skoðaði nokkrar stafkirkjur og stórbrotið landslag. Hef gaman af að hlusta á tónlist og fara á tónleika. Er fyrir óperur, klassíska músík, rokk, popp, hip hop, nýaldartónlist og þungarokk svo eitthvað sé nefnt. Söngur er í miklu uppáhaldi, hef oft verið í sönghópum og tekið þátt í kórastarfi. Heimsækja söfn, fara á kaffihús, bíó, veislur og út að borða í góðum félagsskap.

Dagurinn: Miðvikudagurinn 20. mars 2024

Klukkan hvað vaknaðirðu og hvað var það fyrsta sem þú gerðir? Vaknaði um 7:00 leytið fór í bað, fann föt fyrir daginn. Skutlaði vinkonu á áfangastað, fór aftur heim og tók smá hugleiðslu áður en mætt var í vinnu. Mæti sjaldan í vinnu án þess að vera með varalit, alltaf rauðan.

Hvað borðaðirðu í morgunmat? Tók ávöxt með í vinnuna.

Hvenær fórstu til vinnu og hvernig? Fór á bílnum rétt fyrir níu í vinnuna, finnst gott að geta skotist á bílnum ef á þarf að halda. Fer vel með orkuna og gleðst yfir litlu hlutunum í lífinu.

Fyrstu verk í vinnunni? Kveiki á tölvunni, stimpla mig inn og byrja að vinna. Það er misjafnt hvaða verkefni eru í vinnslu og hvað dettur inn á borð sem breytir planinu. Er búin að setja markmið hvað eigi að klára yfir daginn, finnst það gott þó kannski þurfi að hliðra aðeins til. Eitt af föstum verkefnum dagsins eru reikningar – þá þarf að skrá, senda í uppáskrift, fá uppáskrift og greiða. Á lifandi vinnustað er alltaf eitthvað sem þarf að takast á við.

Hvað varstu að gera klukkan 10? Gera kaffibolla – Americano og spjalla við samstarfsmann.

Hvað gerðirðu í hádeginu? Fór heim að borða og gaf fuglunum að borða út um gluggann í eldhúsinu. Fuglarnir elska laufabrauðsafganga, Cheerios, epli, sum korn, brauð, smjör og fleira orkuríkt.

Hvað varstu að gera klukkan 14? Sendi tölvupósta á nokkur fyrirtæki.

Hvenær hætt og það síðasta sem þú gerðir í vinnunni? Hætti um fjögur leytið, endaði á að stimpla mig út og kasta kveðju á samstarfsmenn.

Hvað gerðirðu eftir vinnu? Fór í búðina, keypti inn og hélt rakleiðis heim. Átti langt skemmtilegt samtal við vinkonu í símanum.

Hvað var í kvöldmat og hver eldaði? Kjúklingabaunasalat með sveppum, salati, vorlauk, gúrku, tómötum og sítrónudressingu. Með þessu var kartöfluréttur eldaður á pönnu. Gerði sjálf salatið en grænkerinn á heimilinu gerði kartöfluréttinn.

Hvernig var kvöldið? Kvöldið var ljómandi gott. Heyrði síðan í annarri vinkonu sem er að gera upp hús fyrir norðan. Horfði á danska þætti í sjónvarpinu og spjallaði við fjölskylduna.

Hvenær fórstu að sofa? Fór að sofa um eitt leytið.

Hvað var það síðasta sem þú gerðir áður en þú fórst að hátta? Færði þeim silfurhærða kaffisopa.

Hvað stendur upp úr eftir daginn? Öll mannlegu samskiptin yfir daginn og kvöldið. Hvað ég er heppin að eiga góða vini.

Eitthvað að lokum? Þeir fiska sem róa.

Dagur í lífi fulltrúa í Stykkishólmi