Nafn: Magnús Geir Eyjólfsson

Fjölskylduhagir/búseta: Við fjölskyldan höfum komið okkur vel fyrir á besta stað í Laugardalnum í Reykjavík. Þar búum við Hildur Bára Leifsdóttir saman ásamt dætrunum Friðriku Rögnu 16 ára og Hrafnhildi Freyju 9 ára. Í kjallaranum er svo litla fjölskyldan, frumburðurinn Hákon Marteinn og kærasta hans Katla Georgsdóttir ásamt hinni tveggja mánaða Þóreyju Helgu.

Starfsheiti/fyrirtæki: Fréttamaður á RÚV, opinberi titillinn ku vera þingfréttaritari.

Áhugamál: Þessa dagana er það aðallega að stara á barnabarnið. Að öðru leyti eru áhugamálin fleiri en ég næ að komast yfir, hvort sem það eru ferðalög, fótbolti, fylgja krökkunum eftir á vellinum eða drekka í mig samfélagsmálin. Golfið á svo hug minn allan þegar grasið fer að grænka.

Dagurinn: Fimmtudagurinn 10. apríl

Klukkan hvað vaknaðirðu og hvað var það fyrsta sem þú gerðir? Dagurinn hófst klukkan 07:30, eins og flestir aðrir dagar. Ég er ekkert að þykjast að vera einhver A Borgartúns týpa sem vaknar hálf fimm og er búinn að fara út að hlaupa, stunda jóga og senda hundrað tölvupósta áður en restin af fjölskyldunni fer á fætur. Síðustu dagar höfðu verið undirlagðir af tollastríði Donalds Trump þannig að fyrsta verk var að grípa í símann til að sjá hvaða óskunda hann hafði gert þann daginn. Kom í ljós að hann var umtalsverður rétt eins og dagana á undan. Svo var farið í að ræsa örverpið, Hrafnhildi Freyju, í skólann. Hún er reyndar orðin mjög sjálfbær þannig að það felst aðallega í að setja nesti ofan í tösku.

Hvað borðaðirðu í morgunmat? Síðustu misserin hef ég alltaf haft minni og minni lyst á morgunmat þannig að þennan daginn, líkt og flesta aðra, var það vatnsglas og kaffibolli.

Hvenær fórstu til vinnu og hvernig? Var lagður af stað tíu mínútur yfir átta, bý blessunarlega tiltölulega stutt frá Efstaleiti þannig að ég var mættur þangað fimm mínútum síðar. Það er best að vera fyrr en seinna á ferðinni því bílastæðunum fer hratt fækkandi upp úr hálf níu.

Fyrstu verk í vinnunni? Fyrsta verk er alltaf að koma við á torginu og grípa sterkan kaffibolla. Svo sest maður fyrir framan tölvuna, virðir fyrir sér dagskrá dagsins og undirbýr sig fyrir morgunfund sem hefst stundvíslega 08:35. Þar er dagurinn á fréttastofunni lagður upp, í útvarpi, sjónvarpi og vef. Alls kyns hugmyndir ræddar, bæði að málum og framsetningu frétta. Þetta eru mjög lifandi fundir og geta slagað upp í klukkutíma.

Hvað varstu að gera klukkan 10? Tíminn frá því fréttafundi lauk og þar til þingfundur hófst var notaður í að kenna verðlaunablaðamanninum Freyr Gígju Gunnarssyni á Fantasy-leik Masters-mótsins í golfi sem hófst síðar þann dag. Það mót reyndist svo vera topp fimm sjónvarpsviðburður sögunnar.

Hvað gerðirðu í hádeginu? Eftir að hafa skilað af mér hádegisfréttinni var rölt upp í mötuneyti þar sem Kiddi bauð upp á ljómandi kjúklingabringu. Bætti þar með upp fyrir reginhneykslið fyrr í vikunni þegar hann bauð upp á pulsur. Þá var mér misboðið.

Hvað varstu að gera klukkan 14? Þingfundur stóð til að verða klukkan 15 þannig að augun voru á honum á þeim tímapunkti.

Hvenær hætt og það síðasta sem þú gerðir í vinnunni? Eftir að hafa skilað af mér nokkrum fréttum á vef og í útvarp var haldið heim á leið, klukkan var þá að verða hálf sex.

Hvað gerðirðu eftir vinnu? Síðdegið var undirlagt sjónvarpsútsendingum þar sem elstu tvö börnin voru að keppa í íshokkí. Annars vegar frá Póllandi þar sem Friðrika Ragna var að keppa með A-landsliðinu á HM í Póllandi og Hákon Marteinn með Skautafélagi Reykjavíkur á Akureyri.

Hvað var í kvöldmat og hver eldaði? Þar sem allur fókusinn var á kappleiki barnanna var hent í pítu með nautahakki sem var græjuð á milli leikhluta. Eins einfalt og það getur orðið en gerði sitt gagn.

Hvernig var kvöldið? Við Hildur Bára erum svo heppin að við eigum tveggja mánaða barnabarn sem býr ásamt foreldrum sínum í kjallaranum. Þannig að það eru öll tækifæri notuð til að fara niður og fá hana lánaða. Það eru ótrúleg forréttindi og fær mann til að gleyma öllum áhyggjum heimsins. Kvöldinu var svo slúttað í fótbolta í úrhellis rigningu með liði Old Boys Þróttar sem er magnaður félagsskapur sem inniheldur tugi virkra meðlima.

Hvenær fórstu að sofa? Gullna reglan er að fara upp í rúm klukkan hálf tólf. Það tókst innan viðunandi skekkjumarka.

Hvað var það síðasta sem þú gerðir áður en þú fórst að hátta? Ég myndi gjarnan vilja segja eitthvað gáfulegt, eins og að glugga í heimsbókmenntirnar eða eitthvað þess háttar. Raunveruleikinn er hins vegar öllu sorglegri, ég leysti Wordle gátu dagsins.

Hvað stendur upp úr eftir daginn? Þessi Worlde gáta var reyndar býsna strembin.

Eitthvað að lokum? Ég fer aldrei til Tene!

Dagur í lífi fréttamanns á RÚV