Nafn: Kristrún Snorradóttir

Starfsheiti/fyrirtæki: Framkvæmdastjóri hjá Hraunfossum – veitingum og kaffihúsi á einum fallegasta stað landsins.

Fjölskylduhagir/búseta: Bý á Laxeyri í Borgarbyggð með karlinum mínum og þremur börnum auk nokkurra gæludýra.

Áhugamál: Það er margt sem vekur áhuga minn. Get nefnt hestamennsku, veiði, að mála myndir og margt fleira.

Vinnudagurinn: Þegar maður er með rekstur í þessum geira er vinnudagurinn mjög sveigjanlegt orð. Maður er alltaf með símann, að vakta tölvupóstinn eða vinna í tölvunni þó að maður sé ekki á sjálfum veitingastaðnum. En ef ég er að opna staðninn þá mæti ég um klukkan 10 og ef ég er allan daginn þar þá er ég komin heim um kl. 20 á kvöldin.

Mætt til vinnu og fyrsta verk? Mæti oftast klukkan 10. Fyrsta verk að slökkva á þjófavarnarkerfinu svo að ég og allir fá ekki hjartaáfall stuttu eftir að inn er komið.

Klukkan 10? Þá opnum við staðinn fyrir gestum.

Í hádeginu? Hlaup og yfirleitt mikil keyrsla, ef ég stend yfir pottum þá er verið að elda, skera, skræla, þeyta, krydda og allt þetta hefðbundna sem þarf að stússast í varðandi matargerð. Ef ég er ekki að elda þá er ég í salnum að afgreiða og tæma borð og fylla á. Svo er alltaf gaman ef maður hefur tíma til að ræða aðeins við viðskiptavinina.

Um miðjan dag eða nánar tiltekið klukkan 15? Þá er oft farið að hægjast aðeins, þá förum við að baka, undibúa næsta dag og oft er það ekki fyrr en upp úr klukkan 15 sem manni gefst tími til að borða hádeigismat.

Síðasta verkið? Setja blessaða þjófarvarnarkerfið í gang og læsa.

Fastir liðir alla daga? Þeir eru margir en hversu mikið þarf að gera fer eftir því sem við vitum um gestakomuna framundan. Því miður eru sumir leiðsögumenn ekki duglegir að láta okkur vita með fyrirvara ef þeir eru að koma með hópa, sem getur leitt til allskonar óvæntra hluta. En maður er orðinn sjóaður í þessu.

Hvað stendur upp úr eftir vinnudaginn? Ánægðir viðskiptarvinir. Það gleður mig alltaf jafn mikið ef fólk gefur sér tíma til að segja álit sitt á því sem við erum að gera.

Var dagurinn hefðbundinn? Já, miðað við árstímann, nema það var 20 gráðu hiti úti sem gerir daginn aðeins betri en suma aðra.

Hvenær byrjaðir þú í þessu starfi? Við opnuðum veitingastaðinn í maí 2017, en ég var búin að vinna við að koma þessu öllu á laggirnar frá því 2015.

Er þetta framtíðarstarfið þitt? Já hver veit, er hérna núna og kann ágætlega við mig.

Hlakkar þú til að mæta í vinnuna? Já, er svo heppin að svo er.

Eitthvað að lokum? Finnst merkilegt hvað margir Íslendingar eru með mikla fordóma gagnvart veitingastöðum sem eru nálægt ferðamannastöðum. Bjóst ekki við að þetta væri svona þegar ég fór að vinna við þetta. Vill hvetja alla samlanda mína til að átta sig á því að það þarf ekki allt að vera fokdýrt þó svo að staðurinn sé úti á landi og nálægt fjölförnum ferðamannastað. Annars bara ást og friður til allra.

Dagur í lífi framkvæmdastjóra við Hraunfossa