Það er ansi margt sem verður eins gott og við gerum það

Nafn: Ragnhildur Sigurðardóttir

Fjölskylduhagir/búseta: Bý á sauðfjárbúinu Álftavatni í Staðarsveit í Snæfellsbæ. Gift Gísla Erni Bjarkarsyni og við eigum unga fólkið; Björk, Jökul og Margréti.

Starfsheiti/fyrirtæki: Framkvæmdastjóri fyrir Svæðisgarðinn Snæfellsnes.

Áhugamál: Náttúra, menning, sögur og samstarf í alls konar samhengi.

Dagurinn: 3. júlí 2024

Klukkan hvað vaknaðirðu og hvað var það fyrsta sem þú gerðir? Vaknaði kl. 7.30, fyrsti fundur dagsins var kl. 8; tók hann því heima. Tölvufundur um endurskoðun samþykkta fyrir Svæðisgarðinn Snæfellsnes; sem er sjálfseignastofnun í atvinnurekstri í eigu sveitarfélaga og félagasamtaka á Snæfellsnesi. Við viljum opna á þátttöku fyrirtækja á þessu 10 ára afmælisári Svæðisgarðsins.

Hvað borðaðirðu í morgunmat? Banana og kaffi. Hvenær fórstu til vinnu og hvernig? Keyrði yfir Fróðárheiði í samvinnurýmið Röst á Hellissandi. Þar er skrifstofa Svæðisgarðsins ca. viku í mánuði, önnur vika í Grundarfirði, þriðja í Stykkishólmi og svo ein í Gestastofu Snæfellsness sem svæðisgarðurinn rekur í félagsheimilinu á Breiðabliki.

Fyrstu verk í vinnunni? Skoða tölvupóstinn og undirbúa fundi.

Hvað varstu að gera klukkan 10? Funda með Heimi markaðs- og kynningarfulltrúa Snæfellsbæjar um nýju heimasíðu Svæðisgarðsins, sem er alveg að verða tilbúin (www.snæfellsnes.is)

Hvað gerðirðu í hádeginu? Fór í heimsókn til vinar míns. Samtal um lífsins gagn og nauðsynjar og fékk að smakka glænýjan rétt úr gellum og ofnbökuðum rófum.

Hvað varstu að gera klukkan 14? Að vinna með Kára Viðarssyni raðfrumkvöðli en hann las inn kynningu á verkefninu okkar um Snæfellsnes Vistvang.

Hvenær hætt og það síðasta sem þú gerðir í vinnunni? Skoðaði nýja aðstöðu Lísu og Hjalta þar sem þau hafa opnað upplýsingamiðstöð og minjagripasölu í Grundarfirði.

Hvað gerðirðu eftir vinnu? Var heima í rólegheitum.

Hvað var í kvöldmat og hver eldaði? Gísli Örn eldaði hakkbollur.

Hvernig var kvöldið? Mamma og Matta systir komu í heimsókn svo það var mikið spjallað.

Hvenær fórstu að sofa? Fyrir miðnætti.

Hvað var það síðasta sem þú gerðir áður en þú fórst að hátta? Spilaði Yatzy.

Hvað stendur upp úr eftir daginn? Þakklæti fyrir að fá að lifa í þessu landslagi og vinna fjölbreytta vinnu með skemmtilegu og kraftmiklu fólki á Snæfellsnesi.

Eitthvað að lokum? Það er ansi margt sem verður eins gott og við gerum það.

*„Lokaverkefni vinnudagsins var að skoða nýja aðstöðu Lísu og Hjalta þar sem þau hafa opnað upplýsingamiðstöð og minjagripasölu í Grundarfirði.“*

Dagur í lífi framkvæmdastjóra