medium

large

thumbnail

1536x1536

2048x2048

small

custom-size

Íbúum fækkar í Skorradal

Marinó Ingi í þjálfarateymi ÍA

Landsréttur lækkar umtalsvert málskostnað til eigenda Borgarbrautar 57-59

Tap hjá Vesturlandsliðunum í annarri deildinni

Níu úthlutanir Hvatasjóðs íþróttahreyfingarinnar til Vesturlands

Vegagerðin beið ekki boðanna og bauð út fyrsta neyðarverkefnið

Nafn: Loftur Árni Björgvinsson



Fjölskylduhagir/búseta: Giftur Christiane Klee og við eigum dóttur sem heitir Mýrún Lotta. Við erum búsett á Grundarfirði



Starfsheiti/fyrirtæki: Ensku- og nýsköpunarkennari við Fjölbrautaskóla Snæfellinga.



Áhugamál: Þau eru mýmörg og upptalning erfið. Þessa dagana er það helst að huga að hænunum mínum, skapa stafræna list (þar sem hænur eru í aðalhlutverki), spila á ukulele, origami, spilagaldrar, leika mér með gervigreind, tungumál, og borðspilið TAC.



Dagurinn: Fimmtudagurinn 7. mars 2024.



Klukkan hvað vaknaðirðu og hvað var það fyrsta sem þú gerðir? Ég vaknaði hálf níu og það fyrsta sem ég gerði var að panikka smá því ég hélt ég væri of seinn í vinnuna. Þegar ég áttaði mig á því að ég kenni ekki fyrsta tíma á fimmtudögum þá klæddi ég mig og burstaði tennurnar.



Hvað borðaðirðu í morgunmat? Kaffi og kanilsnúður á kaffistofunni í skólanum.



Hvenær fórstu til vinnu og hvernig? Ég rölti í vinnuna laust yfir klukkan 9.



Fyrstu verk í vinnunni? Bjóða fólki góðan dag, fá mér morgunkaffibollann, kveikja á tölvunni og athuga póstinn. Svo hófst fyrsta kennslustund dagsins hjá mér klukkan 9:35 en á fimmtudögum byrja ég daginn á heimspekitíma.



Hvað varstu að gera klukkan 10? Ég var með heimspekitíma að spjalla um hugtakið ríki í víðum skilningi, stjórnarfar, stjórnskipan og fleira í þeim dúr.



Hvað gerðirðu í hádeginu? Ég rölti heim til mín og fékk mér hádegismat. Þegar ég var búinn að snæða þá gaf ég hænunum smá spínat áður en ég fór aftur í vinnuna.



Hvað varstu að gera klukkan 14? Ég var með enskutíma. Við vorum að ræða smásöguna Confido eftir Kurt Vonnegut og velta fyrir okkur hvernig sagan á kannski meira við í dag en þegar hún var skrifuð.



Hvenær hætt og það síðasta sem þú gerðir í vinnunni? Ég var búinn með kennslu klukkan 14:30. Áður en ég fór heim þá setti ég eitt prent af stað í einum af þrívíddarprentaranum okkar.



Hvað gerðirðu eftir vinnu? Ég fór heim og fékk mér síðdegiskaffi. Svo spilaði ég á ukulele í sirka tíu mín. Eftir það þá rölti ég upp í rafíþróttasetrið hér í Grundarfirði til þess að athuga hvernig gengi en þjálfarinn okkar var vant við látinn í dag svo tölvuumsjónarsnillingurinn okkar, hann Miro, var með tíma dagsins. Svo fór ég á skólanefndarfund kl. 17 en þar vorum við að fara yfir næstu skref í innleiðingarferli nýrrar menntastefnu Grundarfjarðar.



Hvað var í kvöldmat og hver eldaði? Í kvöldmat voru Udon Teriyaki grænmetisnúðlur og, aldrei þessu vant, þá eldaði ég en ég er ekki góður kokkur og því gott að æfa sig af og til.



Hvernig var kvöldið? Bara rólegt og gott. Eftir kvöldmat þá horfðum við frúin á gamla Bond mynd með öðru auganu. Svo fór ég um tíuleytið og hitti nokkra félaga á Discord og við spiluðum tölvuleiki saman.



Hvenær fórstu að sofa? Aðeins seinna en ég hafði áætlað. Fór í háttinn laust eftir miðnætti og var sofnaður rétt fyrir eitt.



Hvað var það síðasta sem þú gerðir áður en þú fórst að hátta? Las smá í reyfaranum Running Blind eftir Lee Child.



Hvað stendur upp úr eftir daginn? Á fimmtudögum stendur morgunheimspekispjallið alltaf aðeins upp úr. Það er rosalega gaman, finnst mér, að byrja daginn á heimspekilegum vangaveltum með ungmennum.



Eitthvað að lokum? Já, ég man bara ekki hvað.

Dagur í lífi framhaldsskólakennara við FSN