Nafn: Lára Hlöðversdóttir

Fjölskylduhagir/búseta: Gift Hirti Hróðmarssyni og bý á Akranesi. Ég á þrjú börn, Vilborgu Júlíu 28 ára, Hlöðver Má 23 ára og Jóhönnu Láru 5 ára. Svo á ég þrjár stjúpdætur, þær Ingveldi Maríu 30 ára, Sigurlaugu Rún 27 ára og Mirru Björt 21 árs. Barnabörnin mín eru þrjú, Hjördís Lára 5 ára, Ylfa Rún 2 ára og Hlöðver Ingi 10 mánaða.

Starfsheiti/fyrirtæki: Ég er fótaaðgerðafræðingur og starfa við mitt fag á snyrti- og fótaaðgerðastofunni Face á Smiðjuvöllum 28 á Akranesi sem ég á ásamt Kristjönu Bjarnadóttur snyrtimeistara.

Áhugamál: Ég hef mikinn áhuga á því að ferðast um Ísland, hvort sem það er að fara í útilegur, fjallgöngur eða vera á gönguskíðum.

Dagurinn: Fimmtudagurinn 27. júní 2024

Klukkan hvað vaknaðirðu og hvað var það fyrsta sem þú gerðir? Ég vaknaði klukkan 7:15. Burstaði tennurnar og reyndi svo að vekja Jóhönnu dóttur mína.

Hvað borðaðirðu í morgunmat? Ég var á hlaupum svo ég greip með mér próteinstykki og fékk mér svo brauð síðar um morguninn.

Hvenær fórstu til vinnu og hvernig? Ég fór í vinnuna klukkan 8 á bíl en skutlaði dóttur minni fyrst á leikskólann Akrasel.

Fyrstu verk í vinnunni? Það var að gera allt klárt fyrir fyrstu skjólstæðinga mína, taka til áhöld og passa að allt væri tilbúið fyrir daginn.

Hvað varstu að gera klukkan 10? Afgreiða og bóka tíma.

Hvað gerðirðu í hádeginu? Ég var að vinna við fótaaðgerð.

Hvað varstu að gera klukkan 14? Brjóta saman handklæði og að vinna við fótaaðgerð.

Hvenær hætt og það síðasta sem þú gerðir í vinnunni? Ég hætti að vinna klukkan 15:45, tók til á stofunni minni, sótthreinsaði áhöld og fór út með ruslið.

Hvað gerðirðu eftir vinnu? Sótti dóttur mína á leikskólann og pakkaði niður og verslaði fyrir útilegu.

Hvað var í kvöldmat og hver eldaði? Það var enginn tími til að elda mat því við vorum á leiðinni í útilegu á Apavatn. Ég fékk mér bláberjaskyr heima og svo pestó pastarétt þegar ég var komin í útileguna.

Hvernig var kvöldið? Kvöldið var mjög ánægjulegt, við komum í góðu veðri inn á tjaldsvæðið og komum okkur fyrir á góðum stað. Seinna var farið að plana næsta dag og þá var ákveðið að fara inn í Landmannalaugar strax á föstudeginum.

Hvenær fórstu að sofa? Klukkan var um hálfeitt.

Hvað var það síðasta sem þú gerðir áður en þú fórst að hátta? Það var að skoða veðurspá helgarinnar.

Hvað stendur upp úr eftir daginn? Að ná því að komast af stað í útilegu eftir vinnudaginn.

Eitthvað að lokum? Ég vona að veðrið verði mjög gott í sumar og allir fái að njóta þess.

Dagur í lífi fótaaðgerðafræðings á Akranesi