Nafn: Bjarni Rúnar Jónsson, alltaf kallaður Baddi.

Fjölskylduhagir/búseta: Ég og eiginkonan Sigrún Mjöll Stefánsdóttir eigum þrjú börn: Sylvíu Mist, Stefán Ými og Rakel Sunnu sem býr ennþá heima hjá okkur á Ásklöpp í Hvalfjarðarsveit. Þetta er nú reyndar allt orðið fullorðið fólk og svo eigum við tengdason, tengdadóttur og barnabarnið Mikael Rúnar.

Starfsheiti/fyrirtæki: Við Sigrún eigum Bílaverkstæði Badda ehf. sem við stofnuðum árið 2017. Ég er menntaður bifvélavirkjameistari og vélsmíðameistari. Ég ætlaði að verða rafvirki og kláraði grunndeild rafiðna og færði mig svo yfir í vélsmíði.

Áhugamál: Ég hef alltaf haft áhuga á öllum vélum og öllu þeim tengt. Æ, svo á ég víst allt of mörg áhugamál eins og til dæmis söng. Ég er hobbíbóndi með kindur og við ferðumst mikið um landið á sumrin.

Dagurinn: Fimmtudagurinn 2. maí 2024.

Klukkan hvað vaknaðirðu og hvað var það fyrsta sem þú gerðir? Ég vaknaði klukkan 7:30, tannburstaði mig, fór í vinnufötin og í fjárhúsin til að athuga með kindurnar. Taldi lömbin sem eru komin og fylgdist með hvort allt væri í lagi.

Hvað borðaðir þú í morgunmat? Ég borða aldrei morgunmat en ég fæ mér kaffibolla.

Hvenær fórstu til vinnu og hvernig? Ég fór klukkan 7:45 sirka og fór á bíl en ætti að sjálfsögðu að hjóla, er alltaf á leiðinni í það.

Fyrstu verk í vinnunni? Fara yfir hvað af tækjum er bókað yfir daginn og skipuleggja hann.

Hvað varstu að gera klukkan 10? Þá var ég að koma úr kaffipásu og fara að vinna aftur.

Hvað gerðirðu í hádeginu? Athugaði með kindurnar, fékk mér að borða og slappaði af fyrir framan sjónvarpið að horfa á breskan glæpaþátt.

Hvað varstu að gera klukkan 14? Þá var ég að athuga með bilaðan lyftara út í bæ.

Hvenær hætt og það síðasta sem þú gerðir í vinnunni? Við hættum klukkan 18:30 og enduðum á að skutla bílum viðskiptavina heim.

Hvað gerðirðu eftir vinnu? Við huguðum að kindunum og mörkuðum lömb.

Hvað var í kvöldmat og hver eldaði? Ég eldaði mér rauðmaga og Sigrún eldaði sér kjötbollur því hún var ekkert spennt fyrir rauðmaganum.

Hvernig var kvöldið? Það var bara fínt, bara slappað af fyrir framan imbann.

Hvenær fórstu að sofa? Ég fór að sofa rétt fyrir klukkan ellefu.

Hvað var það síðasta sem þú gerðir áður en þú fórst að hátta? Fór í sturtu.

Hvað stendur upp úr eftir daginn? Hversu mikið ég náði að áorka, bæði í vinnunni og heima.

Eitthvað að lokum? Gleðilegt sumar!

Dagur í lífi eiganda Bílaverkstæðis Badda