Nafn: Þorsteinn Guðmundur Erlendsson

Fjölskylduhagir/búseta: Einhleypur, laus og liðugur.

Starfsheiti/fyrirtæki: Bakari í Geirabakaríi.

Áhugamál: Veiði, íþróttir, útivera, fjallgöngur.

Dagurinn: 14. maí 2025.

Klukkan hvað vaknaðirðu og hvað var það fyrsta sem þú gerðir? Ég vakna klukkan 04:30, mæti í vinnu klukkan 5 og byrja á því að skella í ástarpunga.

Hvað borðaðirðu í morgunmat? Langloku með skinku, eggjum, káli og pítusósu ljómandi gott.

Hvenær fórstu til vinnu og hvernig? Klukkan 04:50 og á bíl.

Fyrstu verk í vinnunni? Taka úr hefskáp og setja í ofna og baka.

Hvað varstu að gera klukkan 10? Klukkan 10 er kaffið búið, þá skelltum við í rúnstykki og langlokur.

Hvað gerðirðu í hádeginu? Þa var ég að ganga frá í bakaríinu og laga hunang fyrir hunangsbollur.

Hvað varstu að gera klukkan 14? Keyrði Sæmund okkar rútubílstjóra í bankann og svo eitra eitt hús fyrir pabba meindýraeyði.

Hvenær hætt og það síðasta sem þú gerðir í vinnunni? Klukkan eitt var ballið búið, velta súrdeginu er það síðasta, henda rusli og þrífa.

Hvað gerðirðu eftir vinnu? Fór með pabba í kaffi til Palla og Ritu í Grenigerði.

Hvað var í kvöldmat og hver eldaði? Grillhúsið eldaði á meðan Tindastóll Stjarnan voru að spila.

Hvernig var kvöldið? Kvöldið var æði, geggjað veður og eintóm hamingja.

Hvenær fórstu að sofa? Kl. 22:30.

Hvað var það síðasta sem þú gerðir áður en þú fórst að hátta? Fá mér vatn og bursta tennurnar.

Hvað stendur upp úr eftir daginn? 18 stiga hiti og geggjað veður! Þá eru allir sáttir.

Eitthvað að lokum? Áfram Borgarnes, ást og umhyggja!

Dagur í lífi bakaradrengs í Borgarnesi