„Þetta er búið að vera ævintýri líkast eftir að ég kom til IFK Norrköping árið 2018. Bæði það að mér hefur gengið vel með liðinu og vegnað vel með landsliðum Íslands, bæði með U-21 árs liðinu og svo var auðvitað alveg ógleymanlegt að koma inn á í mínum fyrsta A- landsleik gegn Englendingum á Wembley leikvanginum í nóvember síðastliðnum,” segir Ísak Bergmann Jóhannesson í samtali við Skessuhorn, en hann nú í jólafríi og staddur í foreldrahúsum á Akranesi. Ísak lék upp yngri flokka ÍA og einn leik með meistaraflokki Skagamanna gegn Þrótti Reykjavík í lokaleik 1. deildar haustið 2018, þá aðeins 15 ára gamall. Þá hélt hann utan og gekk til liðs við IFK Norrköping í desember sama ár ásamt frænda sínum Oliver Stefánssyni.

Mikil Skagatenging við Norrköping

Það er mikil Skagatenging við IFK Nörrköping og samstarf er á milli liðsins og ÍA. Hér áður fyrr léku bræðurnir Stefán Þórðarson og Þórður Þórðarson með liðinu. Þá lék Arnór Sigurðsson með því en var síðan seldur til CSKA Moskvu. Nú hefur Ísak bæst í þann hóp og verður væntanlega ekki langt að bíða að hann hverfi á braut til annars félags.

Ísak flutti til Svíþjóðar ásamt fjölskyldu Olivers í byrjun árs 2019. En foreldrar Olivers eru Stefán Þórðarson og Magnea Guðlaugsdóttir móðursystir Ísaks. Þeir Ísak og Oliver bjuggu saman í íbúð í fjölbýlishúsi og Stefán og Magnea ásamt fjölskyldu sinni í sama húsi og voru þeim til halds og trausts. Ísak segir að þetta hafi hentað þeim mjög vel í byrjun, en síðasta hálfa árið hefur hann búið í sinni eigin íbúð í Norrköping. „Mér hefur liðið mjög vel í borginni. Hún er vinaleg og falleg en þar búa um eitt hundrað þúsund manns og er tíunda stærsta borg Svíþjóðar. Hún er vel staðsett fyrir sunnan Stokkhólm í suðurhluta Svíþjóðar.

Ég fékk strax tækifæri til að æfa með aðalliðinu aðeins 15 ára gamall og það var mikil áskorun fyrir mig. Ég lék til að byrja með í U-19 ára liði félagsins til þess að komast í leikæfingu.“ Þrátt fyrir ungan aldur er Ísak mjög agaður því auk hefðbundinna æfinga tekur hann sjálfur sínar aukaæfingar meðal annars til auka snerpu og úthald.

Lagði upp tvö mörk í sínum fyrsta leik

„Ég lék síðan minn fyrsta leik í Allsvenskan sem er efsta deild í Svíþjóð þann 27. júní í sumar. Það var leikur gegn Östersunds FK á útivelli. Þessi leikur er mér minnisstæður þar sem ég lagði upp tvö mörk í leiknum. Við vorum undir í leiknum 1:2 þegar um tíu mínútur voru eftir og tókst mér að leggja upp tvö mörk eftir það í 4:2 sigri. Einnig er mér minnisstæður leikurinn gegn IFK Göteborg þar sem ég skoraði mitt fyrsta mark sem atvinnumaður í 3:1 sigri. Mín uppáhaldsstaða á vellinum er framarlega á miðjunni en einnig hef ég leikið nokkra leiki vinstra megin á miðjunni.“

IFK Norrköping hafnaði í sjötta sæti í Alsvenskan aðeins þremur stigum frá liðinu í þriðja sæti. „Það var gríðarlega svekkjandi að enda ekki ofar í deildinni,“ viðurkennir Ísak, enda metnaðarfullur eins og hann á kyn til. „Í lokaumferðinni áttum við heimaleik gegn Helsingborg sem var í næstneðsta sæti. En við töpuðum leiknum 3:4 og misstum þar af tækifærinu á að ná Evrópusæti. Þessi lokaleikur liðsins var dálítið dæmigerður fyrir liðið. Jens Gustafsson þjálfari liðsins hefur lagt mikla áherslu á skemmtilegan sóknarleik en það er stundum á kostnað varnarleiksins. En hann er samt frábær þjálfari sem er óhræddur við það að gefa yngri leikmönnum tækifæri með liðinu og naut ég meðal annars góðs af því.“

Fyrsti landsleikurinn var á Wembley

En þetta var líka frábært ár hjá Ísak með landsliðum Íslands. Undir 21 árs liðið náði að tryggja sig í úrstlitakeppnina sem fram fer í Ungverjalandi í lok mars og verða Íslendingar þar í riðli með Rússum, Dönum og Frökkum. „Við náðum að tryggja okkur í úrslitin með tveimur góðum sigrum á lokasprettinum gegn Svíum 1:0 á Víkingsvellinum og fræknum sigri gegn Írum ytra þar sem Valdimar Þór Ingimundarson skoraði sigurmarkið í uppbótartíma í 2:1 sigri. Ég náði að leika minn fyrsta landsleik með landsliði Íslands í Þjóðadeildinni núna í nóvember þegar ég kom inn á sem varamaður gegn Englendingum á Wembley leikvangnum í Lundúnum. Þrátt fyrir tap var þetta ógleymanlegt að fá mitt fyrsta tækifæri með liðinu á þessum sögurfræga leikvangi,”segir Ísak.

Eins og áður sagði er Ísak í jólafríi heima á Akranesi. „Það er alveg frábært að koma heim og vera hérna um jól og áramót en æfingar hefjast að nýju hjá mér 7. janúar. Síðan verður bara að koma í ljós hvað framtíðin ber í skauti sér,“ segir Ísak að endingu.

Búið að vera ævintýri líkast