medium

large

thumbnail

1536x1536

2048x2048

small

custom-size

Yngstu og elstu spilararnir á toppnum

Tónlistarskóli Borgarfjarðar sýnir atriði úr Skilaboðaskjóðunni

Akranesdeild RKÍ blæs lífi í vinaverkefnið

Skagamenn töpuðu fyrir Sindra

Séra Hildur Björk sett í embætti

Fimmta tap Skallagríms í röð

Tónlistarmaðurinn Mugison hefur verið á ferðinni á tónleikaferð um landið undanfarið og var með alls níu tónleika í septembermánuði fyrir austan og norðan. Blaðamaður Skessuhorns hringdi í Mugison um síðustu helgi til að heyra hvernig gengi. Mugison heldur tónleika í Borgarnesi og á Akranesi í vikunni og segir hann að hingað til hafi verið uppselt á nærri alla tónleika í ferðinni, utan einna. „Ég myndi ekki segja að ég væri svona vinsæll heldur það að ég er að spila á svo litlum stöðum, ég hugsa að það sé frekar málið.“
Þú verður með tónleika í Borgarnesi og á Akranesi í næstu viku sem eru þegar uppseldir. Kemur það þér á óvart hvað hefur gengið vel? „Bíóhöllin á Akranesi er óvenju stór tónleikastaður miðað við það sem ég hef verið að gera á þessum túr. Yfirleitt er ég að spila fyrir svona 70-80 manns þannig að ég er greinilega vinsæll á Akranesi og ég er að fíla það. Það eru þó nokkur ár síðan ég spilaði í Bíóhöllinni síðast og er mjög spenntur að koma á Skagann því ég hef komið þarna mjög reglulega og eins í Borgarnes. Það er kannski það, ef maður er duglegur að koma þá er erfiðara að gleyma manni.“
Pabbinn á efri hæðinni
Tónleikar Mugison í Borgarnesi verða í Landnámssetrinu og segir hann að Kjartan Ragnarsson hafi eiginlega samið með þeim Gúanóstelpuna sem kom út á plötunni Haglél árið 2011. „Hann leikstýrði laginu þegar við vorum að semja það í gamla daga. Þar vorum við, ég og sonur hans og konan mín. Það var smá djamm í kjallara, pabbinn á efri hæðinni var einnig á djamminu og hann kom annað slagið niður til að tékka á hvernig gengi. Hann var svona að leikstýra þessu og það var helv… gaman! Svo það er ekki hægt annað en að spila hjá kallinum þegar maður fer í Borgarnes.“
Hollt fyrir mann að spila þessi nýju lög
En hvað fá tónleikagestir að sjá og heyra á þessum tónleikum? „Ég er með gítarinn og svo er ég með trommuleikara sem heitir Kristófer Rodriguez Svönuson úr Kópavoginum, algjör meistari. Hann er ekki bara með trommusett heldur einnig alls konar „percussion“ bongó og indíánatrommur og fullt af alls konar smádrasli sem ég veit ekki einu sinni hvað heitir og hann lemur þetta eins og enginn annar. Síðan verða þessi helstu lög á dagskránni og svo hef ég verið að henda inn svona tveimur til þremur nýjum lögum sem ég reyni að skipta út á milli tónleika. Það er svo hollt fyrir mann að spila þessi nýju lög og reyna að troða þeim inn í hausinn á fólki áður en þau koma út. Þetta er nauðsynlegt í ferlinu að finna hvernig þessi lög virka á aðra og koma út, ekki ósvipað eins og vera allsber fyrir framan fólk og hugsa: Ahh, ég verð að drulla mér í megrun.“
Ég sá magnaða tónleika með þér á Gamla Kaupfélaginu í fyrra að ég held. Þar varstu einn með gítarinn ásamt konu þinni Rúnu og varst Mjúkison eins og konan þín vill að þú sért oftar en hitt. Hvort finnst þér skemmtilegra, að vera mjúki maðurinn eða harði rokkarinn? „Mér finnst þessi blanda svo skemmtileg. Ef ég spila til að mynda þrjú róleg lög í röð á tónleikum þá finnst mér eins og fólk langi heim ef ég tek fjórða. Sama með hitt, ef ég tæki fjögur blúsrokklög í röð þá myndi fólk verða þreytt í eyrunum og einnig langa heim. Maður reynir að búa til einhverja kjötsúpu sem fólki líkar við.“
Vöðvi sem hefur rýrnað aðeins
Svo heldur tónleikaferðin áfram, er mest á höfuðborgarsvæðinu og lýkur í byrjun desember í Reykjavík. Er þetta það skemmtilegasta sem þú gerir sem tónlistarmaður? „Það er eins og maður eigi uppsafnaðan kvóta eftir síðustu tvö ár. Þetta er svona vöðvi sem hefur rýrnað aðeins. Ég finn það núna eftir að hafa spilað mikið síðasta mánuðinn að þetta er allt að koma og maður hefur ansi gott af þessu, bæði puttarnir, röddin og ekki síst það að hitta fólk. Ég verð að viðurkenna það þegar ég byrjaði að spila í maí að þá var ég þó nokkuð feiminn, ég gat varla sagt brandara. Það var eins og sá vöðvi hefði rýrnað aðeins of mikið. Í gegnum árin hef ég verið mjög duglegur að túra og þetta helst allt í hendur einhvern veginn því að spila fyrir fólk er lífsnauðsynlegt fyrir mig.“
Nú gafst þú út lagið Haustdansinn á dögunum en gafst síðast út plötuna Enjoy! árið 2016. Er væntanleg stór plata frá þér á næstunni? „Já, hún er meira og minna tilbúin. Það eru að detta inn lög vonandi á svona tveggja mánaða fresti og svo ætti platan að koma út fyrir næsta sumar.“
Heldur betur gaman að vera til
Þegar blaðamaður spyr hvort hann sé alltaf kallaður Mugison af vinum og vandamönnum svarar hann því til að svona níu af hverjum tíu kalli hann Mugison og einhverjir af vinum hans sem kalla hann Mugi. „Svo eru það mamma mín og Rúna sem kalla mig Ödda, svo strákarnir mínir sem segja pabbi og þá er allt upptalið.“ En svona að lokum, er gaman að vera til og hvaða tilfinningu hefur þú fyrir því sem framundan er? „Það er heldur betur gaman að vera til, Jesús minn. Það er svo gott að eldast og mér hefur aldrei liðið eins vel. Það er mikil gróska núna, ég ætla að klára þessa plötu almennilega og hún er langt komin. Svo eru nokkur verkefni sem ég get ekki beðið eftir að fara í alveg á milljón. Ég þori ekki að tala um það núna hvað það er en það kemur allt í ljós og er hrikalega spennandi.“

„Að spila fyrir fólk er lífsnauðsynlegt fyrir mig“