Allflestir þekkja til tímabila í sínum heimilisrekstri að þurft hafi að herða sultarólina. Spara í útgjöldum, leyfa sér ekki allt sem hugurinn girnist og forgangsraða. Fáir sem ekki hafa þurft að ganga í gegnum slík tímabil um lengri eða skemmri tíma. Í yfirfærðri merkingu á nákvæmlega það sama við í rekstri fyrirtækja, stofnana eða ríkissjóðs, ef því er að skipta. Allir þekkja umræðuna um fjármál Ríkissjóðs og forgangsröðun verkefna í velferðarsamfélagi. Sitjandi ríkisstjórn hefur sett sér markmið um hallalaus fjárlög árið 2027. Til að ná því skal í senn auka skattlagningu og draga úr útgjöldum. Það fyrrnefnda er kannski öllu viðkvæmara því samhliða aukinni skattlagningu eru það alltaf einhverjir hópar fyrirtækja eða einstaklinga sem greiða þurfa meira til samneyslunnar en þeir hafa gert. Ekki þarf að fletta mörgum síðum dagblaða þessa dagana til að finna dæmi um þá umræðu.

Frá því um áramót höfum við á Skessuhorni staðið frammi fyrir því að breytinga væri þörf. Rétt eins og Kristrún og félagar í ríkisstjórninni sáu fyrir jól. Í byrjun ársins var ljóst að tekjur okkar voru að óbreyttu ekki að duga fyrir kostnaði og af litlu eigið fé að taka. Farið var í viðamikla endurskoðun á okkar rekstri sem leitt hefur til þess nú að búið er að draga saman seglin sem nemur hálfu öðru stöðugildi, framleigja hluta skrifstofuhúsnæðis sem við höfum haft á leigu og hætt með útgjaldaliði sem ekki var brýn þörf á.

Ekki skal draga fjöður yfir þá staðreynd að grundvöllur einkarekinna fjölmiðla er í raun brostinn. Það er ekki séríslenskt fyrirbrigði, heldur á alþjóðavísu. Hér á landi er hins vegar einum ríkisreknum fjölmiðli haldið á floti í pólitísku skjóli allra stjórnmálaflokka. Sex til sjö milljarða króna forskot fær sá miðill með skattlagningu almennings og fyrirtækja. Það má vel deila um ágæti þessa fyrirkomulags, en harla einkennilegt er að við þetta forskot getur síðan RUV harkað á auglýsingamarkaði í beinni samkeppni við alla aðra fjölmiðla landsins. Augljóslega með forskot sem ekki er hægt að keppa við. Einkareknir fjölmiðlar keppa einnig við ríkustu viðskiptajöfra þessa heims um auglýsingar en þeir eiga alþjóðlega samfélagsmiðla. Íslensk stjórnvöld kjósa að skattleggja ekki samfélagsmiðla eins og íslensku miðlana. Eftir standa því einkareknir fjölmiðlar í vonlausri samkeppnisstöðu.

Undanfarin ár hefur ríkissjóður styrkt alla einkarekna fjölmiðla hér á landi um sem nemur 8,3% af því sem Ríkisútvarpið fær ár hvert. Árlega í fimm ár hefur síðan verið þvargað og þvælt um þann stuðning og ýmsir sem séð hafa ofsjónum yfir því hversu illa sé verið að fara með almannafé. Ég hef skoðað afkomu þeirra á að giska 27 fjölmiðla sem notið hafa ríkisstuðnings. Tek það skýrt fram að Skessuhorn er einn þeirra. Skemmst er frá því að segja að líklega er enginn þessara 27 fjölmiðla fjárhagslega gjaldfær ef ekki nyti stuðnings frá hinu opinbera til rekstrar. Styrkir þessir hafa því lengt lífdaga allflestra þessara miðla sem væru hættir starfsemi fyrir nokkru nyti þeirra ekki við. Algjör óvissa er hins vegar nú um áframhald styrkja til einkarekinna fjölmiðla og ekki einu sinni byrjað að skrifa lög um slíkt.

Af þeirri ástæðu ákvað ég í byrjun þessa árs að það væri óafsakanlegt að halda áfram rekstri útgáfunnar upp á von og óvon um pólitískan stuðning hins opinbera. Við erum þannig í algjörri óvissu rétt eins og bændur þar sem búvörusamningur rennur brátt út og útgerðin sem leggja á auknar álögur á samkvæmt lagafrumvarpi um veiðigjöld. Ég ákvað því að reyna allt sem í okkar valdi stendur til að hagræða enn frekar í rekstri Skessuhorns. Mannabreytingar hafa nú átt sér stað, búið er að velta við hverri krónu í rekstri og nú leggjumst við á bæn og vonum að alþingismenn sjái brátt ljósið um mikilvægi þess að frjáls fjölmiðlun verði áfram stunduð hér á landi. Þeir tryggi með einhverju móti rekstur allra annarra innlendra fjölmiðla en bara Ríkisútvarpsins. Um áramót verður komið í ljós hvort þessi ákvörðun mín að halda áfram rekstri sé byggð á sandi eins og í tilfelli heimska mannsins sem byggði hús sitt forðum.

Magnús Magnússon

Á sandi byggði heimskur maður hús