Borgarbyggðarlistinn er ný stjórnmálahreyfing sem var stofnuð í apríl síðastliðnum. Hreyfingin byggir á breiðum grunni félagshyggjufólks úr ólíkum áttum samfélagsins, með sameiginlegri sýn frá miðju til vinstri.

Listinn nýtur formlegs stuðning Vinstri grænna, Samfylkingar og óháðra. Það er þó mikilvægt að undirstrika að Borgarbyggðarlistinn er hvorki afleggjari né staðgengill einstakra flokka, heldur sjálfstæð hreyfing félagshyggjufólks sem sameinast um ákveðin samfélagsleg gildi og framtíðarsýn fyrir Borgarbyggð. Í því samhengi er listinn heldur ekki ný hugmynd í íslenskum sveitarstjórnarmálum. Sambærileg félagshyggjuframboð hafa áður litið dagsins ljós í sveitarfélaginu þar sem fólk hefur sameinast þvert á flokka um félagslegt réttlæti, lýðræði og hagsmuni almennings.

Við erum stolt af þeirri málefnalegu og kraftmiklu kosningabaráttu sem við áttum undir slagorðinu „Borgarbyggð fyrir okkur öll“. Sú vinna skilaði okkur tveimur fulltrúum í sveitarstjórn og þátttöku í meirihlutasamstarfi með Sjálfstæðisflokknum.

Frá upphafi lögðum við áherslu á inngildingu og lýðræðislega þátttöku. Stefna listans var því meðal annars gefin út á ensku og pólsku til að ná betur til fjölbreyttra hópa í Borgarbyggð. Við buðum jafnframt öllum sem þess óskuðu akstur á kjörstað, líkt og aðrir flokkar gerðu. Þar á meðal voru átta manns af úkraínskum uppruna sem nýttu sér far á kjörstað á kjördegi. Sumir hafa talið að það hafi ráðið úrslitum um góða kosningu listans, en slíkar fullyrðingar standast hvorki tölfræðilega né lýðræðislega skoðun.

Við lítum svo á að lýðræði byggist á virkri þátttöku alls þess fólks sem myndar samfélagið. Kosningaréttur til sveitarstjórnarkosninga 2026 er ekki bundinn við uppruna, þjóðerni, kyn, stöðu eða stjórnmálaskoðanir, heldur er hann grundvallarréttur allra íbúa sem taka þátt í samfélaginu og lifa lífi sínu í Borgarbyggð. Flóttafólk og innfæddir, konur og karlar, ungt fólk og eldra fólk, bændur, fatlaðir, námsmenn og launafólk, allt eru þetta jafngildir þátttakendur í lýðræðinu. Sú sannfæring, að samfélagið tilheyri okkur öllum og að rödd hvers einstaklings hafi gildi, er kjarninn í þeirri stjórnmálasýn sem Borgarbyggðarlistinn stendur fyrir.

Það er einnig mikilvægt að viðurkenna að flóttafólk velur sér ekki þau örlög sem það stendur frammi fyrir. Stríð, ofsóknir, fátækt, náttúruhamfarir eða hnattræn hlýnun eru aðstæður sem fólk neyðist til að bregðast við, þetta er ekki sjálfvalin lífsleið. Einmitt þess vegna skiptir máli að fólk sem hefur orðið fyrir slíkum áföllum fái rödd og raunverulega þátttöku í þeim samfélögum sem það býr í núna, frekar en að verða að skotmarki og látin taka ábyrgð á þeirri gremju sem verður til þegar fólk upplifir að það hafi misst áhrif, eða ekki fengið nægan pólitískan hljómgrunn.

Sagan kennir okkur að heilbrigð eða farsæl samfélög byggja ekki á orðræðu útilokunar og annarleika. Samfélög styrkjast ekki með því að gera fólk tortryggilegt heldur með því að byggja sameiginlega framtíð á mannlegri reisn, félagslegum réttindum og virkri þátttöku allra.

 

Jovana Pavlović

Höfundur er oddviti Borgarbyggðarlistans