Hverjir skipa efstu sæti á lista Sjálfstæðisflokksins í Borgarbyggð?

Frambjóðendur XD í Borgarbyggð

Sjálfstæðisflokkurinn í Borgarbyggð býður fram sterkan og áreiðanlegan lista í komandi sveitarstjórnarkosningum. Listinn samanstendur af fjölbreyttum hópi fólks sem er búsett um allt sveitarfélagið. Eitt af helstu áherslumálum Sjálfstæðisflokksins á komandi kjörtímabili er að gera Borgarbyggð að enn betri búsetukosti fyrir fjölskyldur, þar sem lögð er áhersla á fjölbreytt atvinnutækifæri, góða menntun og metnaðarfullt tómstunda- og íþróttastarf fyrir alla aldurshópa. Sem hluti af þeirri vegferð verður farið í sérstakt átak til að fjölga íbúum og gera fyrirtækjum enn auðveldara með að starfa í Borgarbyggð.

Fyrsta sætið skipar Lilja Björg Ágústsdóttir. Lilja er menntaður grunnskólakennari og lögfræðingur og starfar við Háskólann á Bifröst. Hún er fædd og uppalin í Búðardal en flutti í Borgarbyggð árið 2006 og býr nú á Signýjarstöðum í Hálsasveit. Lilja er gift Þorsteini Pálssyni rafmagnstæknifræðingi og eiga þau fjóra syni. Á síðasta kjörtímabili var Lilja varaformaður í fræðslunefnd og varamaður í sveitarstjórn en auk þess var hún dugleg að taka þátt í ýmsum starfshópum fyrir hönd sveitarstjórnar. Núna er hún formaður stýrihóps um stefnumótun í íþrótta- og æskulýðsmálum og formaður byggingarnefndar leikskólans Hnoðrabóls. Lilja leggur áherslu á faglega og opna stjórnsýslu þar sem íbúar eru vel upplýstir og hafa tækifæri til að hafa áhrif á stjórn sveitarfélagsins og undirbúning stefnumótunar.

Í öðru sæti listans er Silja Eyrún Steingrímsdóttir. Silja er menntaður stjórnsýslufræðingur  en starfar nú sem skrifstofustjóri hjá Stéttarfélagi Vesturlands. Hún er fædd og uppalin á Akranesi en hefur verið með annan fótinn í Borgarnesi síðan 1998 og búið þar síðan 2006 ásamt eiginmanni sínum Pálma Þór Sævarssyni, byggingartæknifræðingi og fjórum börnum. Silja hefur mikinn áhuga á félagsmálum og  tók meðal annars þátt í mótun nýrrar stefnu í upplýsinga- og lýðræðismálum á kjörtímabilinu, hún situr í foreldraráði leikskólans Klettaborgar og hefur verið formaður foreldrafélags Grunnskólans í Borgarnesi. Silja leggur meðal annars áherslu á að farið verði í sérstakt átak til fegrunar Borgarness en í því felst meðal annars viðhald gatna og gangstétta innan bæjarins. Einnig að bæta aðstöðu til íþróttaiðkunar með auknu aðgengi að íþróttamannvirkjum. Í því skyni verði farið í faglega stefnumótunarvinnu með hagsmunaðilum um uppbyggingu og framtíðarstarfssemi íþróttamannvirkja sveitafélagsins þar sem meðal annars verður skoðaður ávinningur af viðbyggingu við íþróttahúsið í Borgarnesi og byggingu fjölnota íþróttahúss.

Þriðja sætið skipar Sigurður Guðmundsson. Sigurður hefur brennandi áhuga á íþrótta- og æskulýðsmálum og er með B.Sc. próf í íþrótta-, lýðheilsu- og kennslufræðum og sveinspróf í húsasmíðum. Sigurður er framkvæmdastjóri UMSB. Hann hefur víðtæka reynslu á sviði íþrótta, viðburðastjórnunar, námskeiðahalds, fundahalda og félagsstarfa hvers konar. Ræturnar til Borgarbyggðar eru sterkar og eftir 15 ár í höfuðborginni flutti hann aftur heim á Hvanneyri, einkum til að láta gott af sér leiða fyrir sveitarfélagið sitt. Sigurður er kvæntur Aldísi Örnu Tryggvadóttur, viðskiptafræðingi og markþjálfa og eiga þau fjögur börn. Hjónin reka heilsutengdu ferðaþjónustuna Coldspot. Sigurður er stoltur Borgfirðingur og telur Borgarbyggð hafa alla burði til að verða eftirsóknarverðasta sveitarfélag landsins fyrir börn, ungmenni, foreldra, vinnandi fólk, atvinnurekendur og aldraða. Hann vill beita sér fyrir aukinni markaðssetningu á Borgarbyggð svo glæða megi hvort tveggja atvinnulífið og mannlífið – til hagsbóta fyrir alla núverandi og verðandi íbúa Borgarbyggðar.

Í fjórða sæti er Axel Freyr Eiríksson. Axel er útskrifaður með B.Ed. í grunnskólakennslu frá Háskóla Íslands og starfar eins og er í Norðuráli. Einnig hefur hann lagt stund við skrif pistla í Skessuhornið. Axel býr í Ferjukoti ásamt unnustu sinni Elísabetu Fjeldsted og saman eiga þau tvö börn. Árið 2008 flutti hann ásamt Elísabetu í Borgarnes og hefur búið í Borgarfirðinum síðan. Félagsmál eru honum hugleikin og er hann félagi í Stangaveiðifélagi Borgarness þar sem hann gegndi gjaldkerastöðu um tíma. Nýverið tók hann svo við sem deildarstjóri Borghreppsdeildar KB. Axel telur meðal annar mikilvægt að auka aðkomu ungs fólks að stjórnsýslunni til að mynda með setu fulltrúa ungmennaráðs í fræðslunefnd og virkari þátttöku ungmenna í stefnumótun og ákvarðanatöku er lýtur að þeirra málefnum.

Fimmta sætið skipar Sigurjón Helgason bóndi á Mel í Hraunhreppi. Sigurjón býr þar ásamt konu sinni Þórey Björk Þorkelsdóttir og saman eiga þau fimm börn. Á Mel er rekið blandað bú, 60 kýr og um 150 kindur. Sigurjón er lærður vélvirki frá Fjölbrautaskóla Suðurlands og búfræðingur frá Landbúnaðarháskólanum Hvanneyri. Sigurjón hefur verið formaður Búnaðafélags Mýramanna í 8 ár. Hann leggur meðal annars áherslu á öflugan landbúnað og styrkingu grunnstoða á borð við samgöngur, fjarskipti og gott aðgengi að þjónustu óháð búsetu.

Að lokum minnum við á opinn kynningarfund með frambjóðendum Sjálfstæðisflokksins í Borgarbyggð fyrir komandi sveitastjórnakosningar. Fundurinn fer fram í Félagsbæ Borgarnesi, fimmtudaginn 12. apríl frá kl. 18:30 – 20:00. Í boði verða léttar veitingar.

 

Með góðri kveðju,

Frambjóðendur Sjálfstæðisflokksins í Borgarbyggð.

Fleiri aðsendar greinar