Góð þjónusta sveitarfélags byggist aðallega á tveimur þáttum: Annars vegar að sveitarfélagið hafi bolmagn og fjármagn til að standa undir þjónustunni, og hins vegar á fólkinu sjálfu sem hjá sveitarfélaginu starfar, þeim sem veita þjónustuna frá degi til dags.

Hvalfjarðarsveit fagnar 20 ára afmæli sínu í sumar og hefur frá upphafi verið fjárhagslega sterkt sveitarfélag. Sú staða byggir á öflugu atvinnulífi í sveitinni, ekki síst í tengslum við Hvalstöðina og umfangsmikla uppbyggingu á Grundartanga á sínum tíma. Þessi trausti grunnur hefur fært okkur dýrmætt svigrúm til að byggja upp aðstöðu og þjónustu við íbúana. Sumt af þessari þjónustu framkvæmum við sjálf, en annað í samstarfi við nágranna sveitarfélög, eins og tíðkast víða um land, sérstaklega þar sem íbúafjöldi er minni.

Hin hliðin – starfsfólkið okkar, aðbúnaður þess og líðan – er þó iðulega minna til umræðu í sveitarstjórnarkosningum. Hlutverk sveitarstjórnar er vissulega að marka stefnu og forgangsraða fjármunum, á meðan það er hlutverk sveitarstjóra og stjórnenda að framkvæma þá stefnu og halda utan um fólkið okkar. Sem stjórnandi með nokkuð viðtæka reynslu úr atvinnulífinu langar mig að setja þennan þátt, og hvernig við mælum árangur, aðeins meira í sviðsljósið.

Ég hef langa og jákvæða reynslu af því að vinna með gögn sem grundvöll í ákvarðanatöku, sérstaklega þegar finna þarf tækifæri til að bæta starfsemina. Hér á ég til dæmis við vinnustaðakannanir sem kortleggja þá þætti sem leiða til ánægju og hollustu í starfi, sem skilar sér undantekningarlaust í betri þjónustu. Gögn geta líka snúið að afgreiðslutíma eða fjölda svaraðra fyrirspurna. Til að setja þetta í hversdagslegt samhengi: Þegar íbúi sendir inn umsókn eða ábendingu til sveitarfélagsins skiptir máli að við vitum nákvæmlega hversu langan tíma afgreiðslan tekur að jafnaði. Með því að gefa íbúum um leið kost á að senda inn rafræna endurgjöf um hvernig til tókst, fáum við dýrmætar upplýsingar. Komi í ljós að ferlið tók of langan tíma eða svörin voru óskýr, þá getum við greint hvar skóinn kreppir og breytt góðri þjónustu í framúrskarandi. Fyrirtæki og stofnanir sem standa sig best í þessum málum spyrja viðskiptavini sína reglulega út í upplifunina og leita markvisst skýringa ef ánægjan fer dvínandi.

Sveitarfélag sem safnar skipulega tölulegum upplýsingum um umfang starfseminnar og fangar reglulega viðhorf bæði starfsfólks og íbúa, getur tekið næsta skref. Það skref felst í að birta þessa tölfræði á vef sínum með reglubundnum hætti. Það gjörbreytir aðgengi íbúa að upplýsingum um virkni sveitarfélagsins og skapar dýrmætt traust.

Það er hlutverk sveitarstjórnar að setja fram framsæknar hugmyndir sem stjórnendur og starfsfólk geta greint og unnið áfram með, íbúum til heilla. Öflug liðsheild verður nefnilega ekki til í tómarúmi, heldur þar sem starfsfólki líður vel, vinnur í skýru umhverfi og upplifir að framlag þeirra sé metið að verðleikum.

 

Einar Þórarinsson

Höf. skipar 4. sæti á A lista Samhentrar sveitar í Hvalfjarðarsveit