Það er ekki heimilt að setja upp vindorkuver í sveitarfélaginu Borgarbyggð samkvæmt Aðalskipulagi sveitarfélagsins og engin áform uppi um að breyta því.

Mikið hefur verið rætt um áform nokkurra aðila þess efnis að rannsaka fýsileika þess að setja upp vindorkuver hér í okkar sveitarfélagi. Þetta mál hefur verið rætt mikið innan hóps sveitarstjórnarmanna Borgarbyggðar, þá sérstaklega í starfshópi um endurskoðun Aðalskipulags sveitarfélagsins.

Eitt af fyrstu verkum nýrra sveitarstjórna er samkvæmt sveitarstjórnarlögum að taka ákvörðun um það hvort að aðalskipulag sveitarfélags þarfnist endurskoðunar. Sú ákvörðun var tekin á kjörtímabilinu 2018-2022 enda var aðalskipulagið komið til ára sinna, en ekki náðist að fara á fullt í þá vinnu á því kjörtímabili. Síðan tók ný sveitarstjórn við árið 2022 og fljótlega var verkefnið boðið út og skipaður starfshópur til þess að halda utan um endurskoðunina, afurðin er nýtt Aðalskipulag Borgarbyggðar 2025-2037.

Krafa frá stjórnvöldum

Snemma í ferlinu varð okkur ljóst að ríkisvaldið gerði þá kröfu á sveitarfélög í landsskipulagsstefnu að í aðalskipulögum sveitarfélaga yrði að fjalla sérstaklega um virkjun vindorku. Hér er um að ræða ófrávíkjanlega kröfu.

Til þess að nefndin hefði einhver gögn til ákvarðanatöku var farið í það að kortleggja sérstaklega hvar væri mögulegt að staðsetja vindorkuver þegar búið væri að útiloka þau svæði sem væru háð takmörkunum, svo sem fjarlægð frá mannvirkjum, friðlýsingu, hæð yfir sjávarmáli og fjarlægð frá miðhálendislínu.

Ríkisvaldið hefur ekki enn látið vinna skilgreiningu á því hvað flokkist til ósnortinna víðerna og þess vegna var farin sú leið að miða við 200 m. hæð yfir sjávarmáli en sú hæðarlína fylgir nánast afmörkunarlínu miðhálendis í gegnum sveitarfélagið ásamt því að vera sama viðmið fyrir takmörkun á því hversu hátt megi planta innfluttum trjátegundum í skógrækt.

Engin áform um vindorkuver

Það að þessi vinna hafi verið unnin hefur að því virðist valdið miklum misskilningi. Því hefur verið haldið fram að meirihluti sveitarstjórnar hafi verið og séu að róa öllum árum að því að greiða götu framkvæmdaaðila vindorkuvera. Það er síður en svo, eins og sjá má á þeim athugasemdum sem sendar voru inn auglýsingartíma skipulagsins. Það var fljótlega í ferlinu tekið samhljóða, þvert á alla flokka í sveitarstjórn, sú afstaða að ekki skyldi gert ráð fyrir því að heimilt yrði að setja upp vindorkuver í sveitarfélaginu, og það er það sem aðalskipulagið segir.

Til rökstuðnings þeirri ákvörðun var meðal annars bent á þá staðreynd að ekki væri búið að móta skýran lagaramma um nýtingu vindorku hér á landi, og einnig þá staðreynd að það er enginn vindorkukostur í nýtingarflokki né biðflokki rammaáætlunar stjórnvalda innan sveitarfélagsins. Ef virkjanakostur hefði verið í biðflokki þá hefðum við þurft að fjalla sérstaklega um þann kost en ekki þurft að setja hann inn á skipulag, hins vegar ef virkjanakostur hefur verið settur í nýtingarflokk af Alþingi þá ber sveitarfélögum að gera ráð fyrir þeim á skipulagi.

Þannig er staðan, það er ekki heimilt að setja upp vindorkuver í sveitarfélaginu Borgarbyggð samkvæmt aðalskipulagi sveitarfélagsins og það er ekki á stefnuskrá okkar framboðs að gera ráð fyrir þeim á komandi kjörtímabili.

 

Davíð Sigurðsson

Höf. er sveitarstjórnarfulltrúi og oddviti framboðs Framsóknarflokksins í sameinuðu sveitarfélagi Borgarbyggðar og Skorradalshrepps.