Betri umgjörð um heilsueflingu eldra fólks

Ein besta og skemmtilegasta leiðin til þess að varðveita eigin heilsu er hreyfing. Mikilvægt er að sveitarfélagið taki virkan þátt í því að stuðla enn betur að heilsueflingu með því að koma á fót markvissri heilsueflingu og forvörnum fyrir eldra fólk ásamt því að efla vitund og vilja til þess að viðhalda heilbrigði. Um 25% íbúa Borgarbyggðar eru 60 ára og eldri. Mikill auður er í þessum hópi íbúa og mikilvægt að líta til þeirra þátta sem lúta að því að bæta heilsu og lífsgæði. Við viljum bjóða upp á fjölbreytt tækifæri fyrir íbúa til að efla þekkingu sína á leiðum til þess að viðhalda góðri heilsu til framtíðar. Borgarbyggð stefnir nú á að taka mikilvægt skref í átt að betri umgjörð um heilsueflingu eldra fólks í samstarfi við Janus heilsueflingu. Við trúum því að markmið um heilsueflingu sé góð fjárfesting sem muni skila ávinningi fyrir samfélagið í heild sinni.

Janus heilsuefling fyrir eldra fólk

Verkefnið mun bera heitið Fjölþætt heilsuefling 60+ í Borgarbyggð – Leið að farsælum efri árum. Fyrirmyndin að verkefninu er doktorsverkefni dr. Janusar Guðlaugssonar, íþrótta- og heilsufræðings. Niðurstöður rannsóknar hans sýndu fram á að með markvissri þátttöku í fyrirbyggjandi heilsueflingu eldri aldurshópa má bæta hreyfigetu 70–90 ára einstaklinga, auka afkastagetu þeirra, sér í lagi þol, styrk og hreyfigetu, bæta lífsgæði hinna eldri og koma í veg fyrir hreyfiskerðingu. Þá sýndi verkefnið einnig fram á mjög jákvæð áhrif við að draga úr áhættuþáttum hjarta- og æðasjúkdóma. Janus heilsuefling hefur með góðum árangri verið í samstarfi við nokkur sveitarfélög á landinu frá árinu 2017 og hafa heilsutengd lífsgæði þátttakenda færst til betri vegar þrátt fyrir hækkandi aldur.

Í ljósi mikilvægi heilsugæslunnar og breyttu hlutverki hennar, m.a. í tengslum við heilsuvernd, verður kappkostað að fá heilsugæsluna í Borgarbyggð að verkefninu. Hér er sérstaklega verið að huga að blóðmælingum og greiningu á efnaskiptavillu og sykursýki. Eitt helsta markmið verkefnisins er að bjóða íbúum í Borgarbyggð 60 ára og eldri uppá markvissa heilsueflingu í formi daglegrar hreyfingar með áherslu á þol- og styrktarþjálfun auk fræðslu um næringu og aðra heilsutengda þætti undir faglegri leiðsögn. Langtíma markmið verkefnisins er að gera einstaklingum í sveitarfélaginu kleift að auka hreysti og skapa tækifæri til búa lengur í sjálfstæðri búsetu og jafnvel starfa lengur á vinnumarkaði. Verkefnið miðar að þeim íbúum 60 ára og eldri sem eru sjálfstætt búandi í Borgarbyggð með lögheimili í sveitarfélaginu.

Stefnt er að því að kynna verkefnið fyrir íbúum á haustmánuðum en verkefnið er skipulagt til tveggja ára og er skipulagið sett upp í þrepum. Á tveimur árum er stefnt að því að gera þátttakendur að mestu sjálfbæra á eigin heilsueflingu þannig að þeir geti í kjölfarið sinnt sinni eigin heilsueflingu áfram á eigin forsendum

Frekari upplýsingar um verkefnið má finna á www.janusheilsuefling.is

Ég er bjartsýn á að eldri íbúar í Borgarbyggð muni vera öðrum fyrirmynd með því að taka þátt í heilsueflingu og gefa sér tíma til að huga að líkama og sál. Heilsan er það dýrmætasta sem við eigum.

 

Guðveig Lind Eyglóardóttir

Höf. er forseti sveitarstjórnar Borgarbyggðar