Af hverju þurfum við ný Hvalfjarðargöng?

Reynir Eyvindarson

Tilvonandi alþingismenn voru boðaðir á fund bæjarstjórnar á Akranesi fyrir síðustu kosningar. Þar var farið í gegnum þau verkefni sem mest er áríðandi að ríkið komi að, og yrðu til hagsbóta fyrir sveitarfélagið. Eitt verkefnið sem talað var um, var að tvöfalda Hvalfjarðargöngin. Þetta kom mér á óvart. Þetta verkefni ættu Akurnesingar ekki að setja í forgang, því það er engin ástæða til að tvöfalda göngin núna. Hér fyrir neðan er það sem er sagt annarsvegar og það sem er rétt hinsvegar í þessu máli. Ég bendi áhugasömum á að lesa evrópureglurnar. Þær fékk ég hjá Regínu, fyrrverandi bæjarstjóra um daginn (sjá neðst).

 

Umferðarþunginn

Það sem er sagt:

Umferðin er orðin svo mikil að göngin anna henni ekki. Þau standast ekki evrópureglur og það er oft biðröð þar.

 

Það sem er rétt:

Núna fara 8000 bílar um göngin á hverjum degi. Samkvæmt evrópustöðlum geta svokallaðir 2+1 vegir annað 20.000 bílum á hverjum degi. 2+1 vegur er stundum 2 akreinar og stundum ein.  Þannig vegur er á Hellisheiði. Fegurðin við slíkan veg er að dýrustu kaflarnir geta verið ein akrein í hvora átt. Þá venjulega með stálvír á milli akreina.  Slíkur vegur er miklu ódýrari en 2+2 vegur (tvær akreinar í hvora átt).  Ef gerður væri slíkur vegur á kaflanum milli Akraness og Reykjavíkur, væri augljóst að göngin yrðu einbreið áfram, en aðrir kaflar á leiðinni yrðu tvíbreiðir. En nú virðist eiga að byrja á dýrasta kaflanum og tvöfalda hann!

Biðraðirnar í göngunum hverfa þegar gjaldskyldan fellur niður á næsta ári.

 

Öryggiskröfur.

Það sem er sagt:

Öryggiskröfur Evrópusambandsins kalla á að göngin verði tvöfölduð.

 

Það sem er rétt:

Reglur Evrópusambandsins kveða á um að þegar 2000 bílar fara í hvora átt (4000 á dag), þurfi flóttaleið úr göngunum vegna hættu á eldsvoða. Flóttaleiðina má gera með manngengum göngum til hliðar við núverandi göng, eða undir veglínunni.  Breidd ganganna gæti verið 10 sinnum minni en fullbúin bílagöng, og þar af leiðandi allt að 10 sinnum ódýrari.  Það eru séríslenskar reglur (mögulega er Noregur með í því) að það þurfi ekki flóttaleið fyrr en þegar 8000 bíla markinu er náð. Svo ef þessi göng væru á meginlandi Evrópu, væru þau búin að vera ólögleg í mörg ár.  Ef menn vilja flýta sér að bæta úr öryggismálunum, gera þeir þjónustugöng.  Það ætti vera miklu fljótlegra að koma þeim upp en nýjum bílagöngum.

 

Staðan núna:

Þetta mál virðist vera ótrúlega langt komið í kerfinu. Vegagerðarmaður sem ég talaði við, sá ekkert nema ný bílagöng. Kom samt ekki með nein rök gegn þjónustugöngum. Vegamálastjóri talar um ný bílagöng.  Og þetta er í tillögum vinnuhóps um samgönguáætlun Vesturlands 2017 – 2029. Gísli Gíslason hafnarstjóri Faxaflóahafna og stjórnarmaður í Speli, er formaður vinnuhópsins.

 

Kveðja, Reynir Eyvindsson

 

Reglurnar sjálfar.

Reglur Evrópusambandsins má finna á þessari slóð:

http://www.reynire.internet.is/blogg/