Nám er ansi stór hluti af lífi allra. Eftir grunnskóla vilja mörg ungmenni prófa eitthvað nýtt og jafnvel flytja að heiman til þess að stunda nám í framhaldsskóla. Þó að foreldrum þyki oft erfitt að sleppa taki af börnunum sínum þá skilja þau það líka að þetta er mikilvægur tími í lífi þeirra til þess að þroskast og mörgum hefur dreymt um að komast í ákveðinn skóla í mörg ár. Um helmingur framhaldsskóla landsins eru á höfuðborgarsvæðinu svo eðlilega stefnir hugur margra þangað. En því miður hafa mörg ungmenni lent í miklum vandræðum því það er ekkert húsnæði í boði fyrir þennan aldursflokk. Fólk berst um hvern einasta fermeter sem er í boði á leigumarkaðinum og leiguverðið hækkar endalaust. Þar sem nemendurnir og foreldrar eiga oftast ekki efni á því að leiga íbúð þá reyna nemendurnir oft að komast að hjá ættmennum og vinafólki.

Margir nemendur hætta nauðugir í því námi sem þeim hefur dreymt um eða komast aldrei í það vegna forgangsleysis í húsnæði á höfuðborgarsvæðinu. Til þess að reyna að leysa þetta vandamál er nauðsynlegt að komið verði á heimavist á höfuðborgarsvæðinu fyrir aðflutta framhaldsskólanema.

Ég fékk tækifæri til þess að setjast á Alþingi í fyrsta sinn nú í byrjun mánaðarins. Þann 12. desember vakti ég athygli á nauðsyn þess að koma á fót heimavist fyrir framhaldsskólanema á höfuðborgarsvæðinu. Á sama tíma lögðum við í Framsókn fram þingsályktunartillögu um efnið.

Þetta er bæði jafnréttismál og öryggismál. Það eiga allir rétt á að stunda nám, óháð búsetu.

 

Lilja Rannveig Sigurgeirsdóttir.
Höf. er varaþingmaður Framsóknarflokksins í Norðvesturkjördæmi og formaður Sambands ungra Framsóknarmanna (SUF).