Ég bý við Hvalfjörðinn, nánar tiltekið í Hlésey. Það eru viss forréttindi að búa við einn fegursta fjörð á landinu, því Hvalfjörður er dásamleg náttúruperla í nágrenni höfuðborgarsvæðisins. Það eru ekki aðeins íbúar Hvalfjarðarsveitar og Kjósarhepps sem eiga þar dýrmætra auðæfa að gæta, heldur allir þeir sem búa í þéttbýlinu á höfuðborgarsvæðinu og nágrenni.

Síðustu áratugi hef ég búið í Hvalfirði og ALDREI mun ég hætta að verja fjörðinn minn fyrir áhrifum ábyrgðarlausra umhverfissóða sem virðast hafa komið sér í ábyrgðarstöður í þeim tilgangi að rústa lífríki hans – á landi, í lofti og í hafi.

Nú er svo komið að öll sóðafyrirtæki leita hófanna í Hvalfjarðarsveit þegar þarf að finna náttúruspjöllum stað, því stjórnvöld hér virðast ekki bera virðingu fyrir nokkrum sköpuðum hlut, allra síst landinu okkar og fólkinu sem þar býr.

Við Grundartanga og Hvalfjörðinn fagra eru biðraðir innlendra og erlendra fyrirtækja sem hyggjast stunda náttúruspjöll og eiturefnahernað – og allir hugmyndasmiðirnir treysta á að  „fégráðugu blindingjarnir í Hvalfirði“ taki þeim fagnandi.

Listinn er langur yfir stórvarasama, óþarfa og mengandi atvinnustarfsemi sem hefur beðið eða bíður þess að geta hafið árás á lífríkið í og við Hvalfjörð:  Malartekja í firðinum, vindmylluver, rafskautaverksmiðja, vítissódatilraunir, fiskeldi á landi, sorpbrennslustöð fyrir höfuðborgarsvæðið, Magnesium verksmiðja, flutninga- og skemmtiferðaskipahöfn og stækkað iðnaðarsvæði við fjörðinn.

Það er löngu komið nóg af heimskulegum ákörðunum sem teknar eru í skjóli myrkurs. Kynningar á þeim hafa ýmist verið engar eða í skötulíki og íbúarnir hafa aldrei fengið að koma að ákvarðanatökum.

Sjö manna sveitarstjórn í u.þ.b. 800 manna sveitarfélagi hefur engan siðferðilegan rétt til að ráðstafa lífríki fjarðarins og lífsgæðum íbúa að eigin geðþótta. Þetta land er ekki í þeirra eigu og þjóðin öll ber ábyrgð á náttúrunni gagnvart komandi kynslóðum.

Vonandi bera íbúar Hvalfjarðarsveitar gæfu til að kjósa íbúalýðræði og opna stjórnsýslu til að hafa þannig áhrif á hvernig lífsgæðum íbúanna og nágranna þeirra verður háttað til framtíðar og hvaða viðmið verði höfð til grundvallar við atvinnuuppbyggingu á svæðinu.

Það má til dæmis gera með því að kjósa Íbúahreyfinguna sem hefur gagnsæi og íbúalýðræði á stefnuskrá sinni, ásamt því að setja íbúana sjálfa í forgang.

 

Jóhanna Harðardóttir, Hlésey