Listfélag Akraness velur í hverjum mánuði Listamann mánaðarins til að koma fram eða sýna verk í Kallabakaríi. Ragnheiður Þóra Grímsdóttir sagnaþula er listamaður nóvembermánaðar. Hún kom fram í bakaríinu síðastliðinn laugardag og ræddi þar við gesti.

Í sýningarskrá kemur fram:

„Flestir hafa gaman af að hlusta á góðar sögur. Í öllum býr sagnamaður sem hefur kannski ekki verið virkjaður. Sögur eru líka frábær leið til að vinna með börnum, unglingum og raunar öllu fólki. Með þeim er hægt að miðla þekkingu, vekja til umhugsunar, örva sköpun eða bara skemmta.

Ragnheiður Þóra var sérkennari við Grundaskóla á Akranesi. Hún var að hluta til sagnaþula við skólann og hélt námskeið í sagnalist fyrir nemendur, kennara m.a. á Kennaraþingum Vesturlands og fyrir almenning.

Þóra starfaði í Félagi sagnaþula frá árinu 2007. Hún hélt norræn sagnaþing sem haldin eru ár hvert til skiptis á Norðurlöndunum. Árin 2011 og 2015 var Norræna sagnaþingið haldið hér á landi og var Þóra þar í undirbúningsnefnd. Þóra sigraði í SöguSlammi á Íslandi vorið 2012. Hún tók þátt í Nordisk Mesterskap í StorySlam í Noregi og Finnlandi, var sú eina af þátttkendum sem sagði sögu á öðru máli en sínu móðurmáli.

Menningarráð Vesturlands hefur tvisvar veitt Þóru styrk til þess að ferðast um svæðið og segja sögur. Hún hefur því heimsótt öll dvalarheimili aldraðra og alla leikskóla á Vesturlandi og sagt sögur. Þær heimsóknir vöktu almenna ánægju. Þóra hefur skemmt sem sagnaþula hjá mörgum félagasamtökum og við ýmsar hátíðir, svo sem á Írskum dögum á Akranesi, Víkingahátíð í Hafnarfirði og Brákarhátíð í Borgarnesi.“

Þóra sagnaþula er listamaður mánaðarins