Axel Gústafsson kaupmaður í Axelsbúð við Merkigerði 2 á Akranesi hefur tekið þá ákvörðun að hætta rekstri og loka verslun sinni. Síðasti opnunardagur verður föstudaginn 18. desember næstkomandi. Fram að því mun hann bjóða 25-30% afslátt af öllum vörum. Þessi dagsetning er ekki tilviljun, en 18. desember árið 1942 opnaði afi Axels og nafni, Axel Sveinbjörnsson, Verslun Axels Sveinbjörnssonar. Lengst af var verslunin til húsa á horni Hafnarbrautar og Suðurgötu. Vöruúrvalið í Axelsbúð var á sínum tíma þekkt og almannarómur á Akranesi sagði að ef vara fengist ekki í Axelsbúð, þá þyrfti fólk ekki á henni að halda! Axel yngri byrjaði sem unglingur að starfa í versluninni. Eftir að Axelsbúð flutti af gamla staðnum hefur hún verið að Merkigerði 2 og þar var byggt við og stærra rými tekið í notkun 2019.

Axel segir í samtali við Skessuhorn að ástæða þess að hann ætlar nú að loka megi einkum rekja til aldurs hans og heilsu. „Ég er kominn á þann aldur að vilja hægja á og njóta þess að vera til,“ segir hann. Axel viðurkennir að það hafi ekki verið auðvelt að taka ákvörðun um að loka versluninni, en hann sé nú búinn að sætta sig við tilhugsunina. „Þetta er vissulega ævistarfið mitt. Hef starfað við verslunina í rúmlega 51 ár. Nú er ég að nálgast sjötugt og því tímabært að rifa seglin,“ segir hann. Axel segist ætla að hafa útsölu í versluninni næstu vikur og fram til lokunar. Einkum eru það reiðhjólavörur og veiðivörur sem hann hefur lagt áherslu á undanfarin ár ásamt fleiru. „Ég vil nota þetta tækifæri og þakka viðskiptavinum mínum fyrir áratugalöng og ánægjuleg viðskipti,“ segir Axel Gústafsson. Hann bætir við að Ingvar Tryggvason er tekinn við reiðhjólaviðgerðum, bæði hefðbundnum- og rafhjólaviðgerðum og verður með þær í húsnæði við Smiðjuvelli. FB síða hans nefnist Reiðhjólaviðgerðir á Akranesi.

**Axelsbúð var opnuð í nýju verslunarrými við Merkigerði 2 í júní 2019. Ljósm. úr safni/mm**

Axelsbúð verður lokað fyrir jól