Árleg fundaferð stjórnar og starfsfólks Bændasamtaka Íslands hefur staðið yfir síðustu daga. Á föstudaginn var komið að fundi sem haldinn var í Ársal á Hvanneyri. Þar mættu um sex tugir gesta, um þriðjungur starfandi bændur en auk þess nemendur skólans og ýmsir aðrir. Yfirskrift fundanna er: „Lausnin er landbúnaður.“

Trausti Hjálmarsson formaður BÍ setti fundinn á Hvanneyri. Í upphafi fór hann í talsvert löngu máli yfir ESB málið og útskýrði þá ákvörðun forystu bænda að mæla gegn því að Ísland tæki að nýju upp viðræður um aðild að Evrópusambandinu í þjóðaratkvæðagreiðslunni 29. ágúst. Sagði hann að samtökin hafi ekki viljað sitja hjá í því máli og; „halda umræðunni með þeim hætti sem landbúnaðurinn ætti skilið,“ sagði hann. Í aðdraganda málsins hafði verið skipuð sjö manna milliþinganefnd búnaðarþings sem skilaði 130 síðna skýrslu sem vakti athygli. Trausti benti á að ekki hafi komið fram efnisleg gagnrýni á skýrsluna. Á aukabúnaðarþingi hafi síðan 95% bænda samþykkt að vera gegn því að Ísland hæfi að nýju viðræður um aðild að ESB. Trausti sagði frá því hvernig bændur hafi upp á sitt einsdæmi komið fyrir heyrúllum á afleggjurum og við þjóðvegi til að segja sína skoðun, eins og frægt varð. Þar hafi ekki síst ungir bændur rutt brautina.

**Sívaxandi verkefni bænda og forystu þeirra, eins og sjá mátti á þessari skjámynd sem formaðurinn varpaði upp**

Trausti fór því næst yfir ferli sem framundan er við gerð nýrra búvörusamninga við ríkið. Fyrri samningur var framlengdur um eitt ár til að skapa tíma til viðræðna sem þarf að ljúka fyrir árslok 2027. Sagði hann að haldið yrði trúnaði um efni nýrra samninga og viðræður við stjórnvöld. „Við munum reyna að ná hagstæðum samningum við stjórnvöld, sama í hvaða flokki þau eru,“ sagði Trausti, en í máli hans kom nokkrum sinnum fram að Viðreisn væri ekki endilega uppháhalds stjórnmálaflokkurinn hans. Þá rakti Trausti hlutverk Bændasamtakanna sem hagsmunasamtaka bænda um fjölmörg málefni sem þeim tengjast. Varpaði hann upp skjámynd sem sýndi hinar ýmsu stefnur stjórnvalda, svo sem matvælastefnu, loftslagsstefnu, þjóðaröryggisstefnu, byggðastefnu, atvinnustefnu, orkustefnu, stefnu um líffræðilegan fjölbreytileika, landskipulagsstefnu, lýðheilsustefnu og svo framvegis. „Landbúnaður er ekki sérhagsmunamál, en hann gegnir sífellt stærra hlutverki í samfélaginu,“ sagði Trausti og bætti við að til að markmið um verkefni bænda eigi að ganga upp þurfi fjármagn að fylgja með til að hægt sé að uppfyllar allar þær skyldur og kvaðir sem á bændur landsins eru lagðar.

Auk Trausta Hjálmarssonar fór Margrét Ágústa Sigurðardóttir framkvæmdastjóri BÍ á fundinum yfir hlutverk samtakanna og helstu áskoranir í dag. Nefndi hún mótmæli við fordæmalausri hækkun kílómetragjalds, tvöföldun á hækkun úrvinnslugjalds á rúlluplast, pizzaost og tollaglugga í útiræktuðu grænmeti sem dæmi um verkefni líðandi stundar. Valur Þorsteinsson kynnti samfélagsmiðlaverkefni BÍ. Eftir það var svarað fyrirspurnum úr sal og boðið upp á veitingar.

**Trausti Hjálmarsson formaður BÍ í ræðustól. Ljósm. jeb**

Forysta bænda á ferð um landið