Úthlutað hefur verið starfslaunum afreksíþróttafólks ÍSÍ fyrir tímabilið 1. nóvember 2026 til ársloka 2027. Markmiðið er að gera íþróttafólkinu kleift að helga sig íþrótt sinni og keppa við þau bestu á alþjóðavettvangi án þess að þurfa að velja á milli íþróttarinnar og afkomunnar. Úthlutað er í þremur flokkum; A, B og C. Fyrir A starfslaun eru greidd 580.000 krónur á mánuði, fyrir B 300.000 krónur og fyrir C 150.000 krónur. Auk launanna fær íþróttafólkið faglegan stuðning frá fagteymi Afreksmiðstöðvar Íslands svo sem á sviði sálfræði, sjúkraþjálfunar, næringarfræði og styrktarþjálfunar og fer umfang hans einnig eftir flokki. Þrír einstaklingar á Vesturlandi fá greidd starfslaun á næsta ári. Guðrún Karítas Hallgrímsdóttir frjálsíþróttakona úr Borgarfirði og Kristín Þórhallsdóttir kraftlyftingakona úr Borgarfirði fá úthlutun samkvæmt B flokki. Þá fær Einar Margeir Ágústsson sundmaður í ÍA úthlutun samkvæmt C flokki.