Nýverið tóku Samtök sveitarfélaga á Vesturlandi á móti hópi gesta frá sveitarfélaginu Jelgava í Lettlandi sem fóru í kynnisferð um Vesturland. Markmið heimsóknarinnar var að fræðast um starfsemi SSV, uppbyggingu stoðkerfis atvinnuþróunar á landsvísu og hvernig unnið er að byggðaþróun, nýsköpun, ferðaþjónustu og sóknaráætlun á Vesturlandi.

Heimsóknin hófst á skrifstofu SSV í Borgarnesi þar sem farið var yfir starfsemi samtakanna og hlutverk Markaðsstofu Vesturlands. Sérstök áhersla var lögð á vinnu við Sóknaráætlun Vesturlands, Uppbyggingarsjóð, atvinnu- og nýsköpunarráðgjöf ásamt verkefnum sem snúa að markaðssetningu áfangastaðarins Vesturlands og þróun ferðaþjónustu.

Jafnframt kynntu fulltrúar frá Jelgava starfsemi sveitarfélagsins, atvinnulíf og ferðaþjónustu á sínu svæði og sköpuðust áhugaverðar umræður um sameiginleg verkefni og þær áskoranir sem landsbyggðarsvæði standa frammi fyrir.

Á meðan á dvölinni stóð heimsótti hópurinn meðal annars Landnámssetrið í Borgarnesi þar sem rætt var um mikilvægi menningararfs og sögutengdrar ferðaþjónustu. Einnig var komið við í Breið þróunarfélagi og nýsköpunarsetri á Akranesi þar sem þátttakendur fengu innsýn í hvernig umbreyta má hefðbundnu atvinnuhúsnæði í vettvang nýsköpunar og skapandi atvinnugreina.

Á öðrum degi heimsóknarinnar lá leiðin um Snæfellsnes þar sem gestir kynntu sér fjölbreytt dæmi um svæðisbundna þróun. Heimsóknir voru meðal annars farnar í Gestastofu Snæfellsjökulsþjóðgarðs, menningarsetrið Himinbjörg á Hellissandi og upplýsingamiðstöð Snæfellsness í Breiðabliki. Þá átti hópurinn fund með Birki Jóni Jónssyni bæjarstjóra í Grundarfirði þar sem rætt var um tækifæri og áskoranir smærri sveitarfélaga á landsbyggðinni.

„Heimsóknin gaf bæði þátttakendum frá Jelgava og fulltrúum Vesturlands tækifæri til að skiptast á reynslu og hugmyndum um byggðaþróun, atvinnusköpun og sjálfbæra ferðaþjónustu. Slík samskipti styrkja alþjóðleg tengsl og skapa verðmæt tækifæri til lærdóms og samstarfs sem geta nýst svæðum beggja landa til framtíðar.

Það er alltaf áhugavert að bera saman ólíkar leiðir í byggðaþróun og atvinnumálum. Þrátt fyrir mismunandi aðstæður eiga svæði eins og Vesturland og Jelgava ýmislegt sameiginlegt þegar kemur að uppbyggingu samfélaga, nýsköpun og þróun ferðaþjónustu,“ sagði Páll S. Brynjarsson framkvæmdarstjóri SSV að heimsókn lokinni.

Gestir frá Lettlandi kynntu sér starfsemi SSV og þróun Vesturlands