Notkun slitþolinnar hástyrkleikasteypu við endurnýjun brúargólfa getur lengt líftíma brúa og dregið úr viðhaldskostnaði. Þessi aðferð var á dögunum notuð við endurbætur á brúnni yfir Gljúfurá í Borgarfirði. Áður en nýtt slitlag var lagt var brúargólfið fræst og skemmd steypa fjarlægð, víða niður að járnbendingu. Vilhjálmur Arnórsson yfirverkstjóri vinnuflokks Vegagerðarinnar á Hvammstanga stýrði framkvæmdinni, Gösli ehf. annaðist afréttingu og yfirborðsfrágang steypunnar, en steypan var hrærð í Steypustöðinni í Borgarnesi.

Steypan er sérstaklega hönnuð með áherslu á slitþol, þéttleika, frostþol og litla rýrnun. Hún myndar þétt og sterkt yfirborð sem ver burðarsteypu og járnbendingu brúarinnar. Áður en nýtt slitlag var lagt var brúargólfið fræst og skemmd steypa fjarlægð. „Notkun slitþolinnar hástyrkleikasteypu getur lengt endingartíma brúargólfa verulega og dregið úr viðhaldsþörf og kostnaði til lengri tíma litið. Steypan þolir meðal annars vel álag frá umferð og slit af völdum nagladekkja. Með þessari aðferð fæst jafnframt sléttara yfirborð sem stuðlar að auknu umferðaröryggi. Annar kostur er að hægt er að endurnýja slitlagið síðar án þess að það hafi áhrif á undirliggjandi burðarvirki brúarinnar,“ segir í Framkvæmdafréttum Vegagerðarinnar.

Frá vinstri: Helgi S. Ólafsson frá Mannvirkjahönnun ehf, Vilhjálmur Arnórsson yfirverkstjóri vinnuflokksins, Anna Elín Jóhannsdóttir verkefnastjóri hjá Vegagerðinni, dr. Ólafur H. Wallevik og Freyr Ágústsson múrari hjá Gösla ehf.

Endurnýjuðu brúargólf með hástyrkleikasteypu