Í gær undirritaði Eyjólfur Ármannsson innviðaráðherra tvo samninga um uppbyggingu og styrkingu fjarskiptainnviða á samtals fimm stöðum á landinu. Annars vegar var gerður samningur við sveitarfélagið Borgarbyggð um bætta farnetþjónustu á svæðinu við Grjótárvatn og Hítardal. Hins vegar var samningur við Öryggisfjarskipti um eflingu fjarskiptainnviða á fjórum svæðum á Vestfjörðum, Austurlandi og við Glym í Botnsdal á Vesturlandi. Þar verður bætt útbreiðsla farnets og aukið þannig öryggi fjarskipta en framlög ráðuneytisins til þessara verkefna nema samtals 37,1 milljónum króna. Undirbúningur er hafinn og stefnt að verklokum vorið 2027.

**Eyjólfur Ármannsson innviðaráðherra og Unnur Brá Konráðsdóttir sveitarstjóri Borgarbyggðar handsala samninginn. Ljósm. Stjórnarráðið**

Bætt farnetssamband í Borgarbyggð

Farnetssamband sunnan Ljósufjalla við Grjótárvatn og í Hítardal er víða takmarkað eins og margsinnis á undanförnum áratugum hefur komið fram í fréttum Skessuhorns. Í tilkynningu frá ráðuneytinu nú kemur fram að markmið verkefnisins sé að bæta almenna farnetsþjónustu og möguleika á neyðarsímtölum, ekki síst ef hættuástand skapast og rýma þarf svæðið. Reistur verður nýr sendastaður nærri Staðarhrauni í neðanverðum Hítardal. Borgarbyggð leiðir verkefnið, sér um uppbyggingu aðstöðu, mastur og tengingar við rafmagn og ljósleiðara. Míla leggur til fjarskiptabúnað og annast uppsetningu hans og rekstur. Framlag ráðuneytisins til stofnkostnaðar sveitarfélagsins er 4,5 milljónir kr. Það var Unnur Brá Konráðsdóttir sveitarstjóri sem undirritaði samninginn fyrir hönd Borgarbyggðar í ráðuneytinu.

Samningurinn við Öryggisfjarskipti nær til fjögurra verkefna á Vestfjörðum, Vesturlandi og Austurlandi. Verkefnin miða að því að styrkja fjarskiptainnviði, draga úr hættu á alvarlegum þjónustutruflunum og auka útbreiðslu farnets á stofnvegum og fjölförnum ferðamannastöðum. Meðal þessara staða er Glymur í Hvalfirði þar sem byggð verður ný fjarskiptaaðstaða sem bætir farnetssamband bæði á stofnveginum um Hvalfjarðarbotn og á fjölfarinni gönguleið að fossinum Glymi. Takmarkað samband á gönguleiðinni hefur meðal annars valdið erfiðleikum þegar slys hafa orðið, en þau hafa verið fjölmörg á liðnum árum. Aðrir staðir samkvæmt samningnum verða Dynjandisheiði og Látrabjarg á Vestfjörðum og Mjóifjörður á Austurlandi. Öryggisfjarskipti annast framkvæmd þessara fjögurra verkefna og eftir atvikum í samstarfi við fjarskiptafyrirtæki og aðra aðila. Framlag ráðuneytisins til stofnkostnaðar er 32,6 milljónir kr.

Með samningi við Öryggisfjarskipti verður bætt farnetssamband við gönguleiðina að Glymi í Botnsdal. Hér er unnið við endurbætur á göngustíg að fossinum. Ljósm. úr safni Skessuhorns / Arnheiður Hjörleifsdóttir

Fjarskiptaöryggi verður bætt í Hítardal og við Glym í Hvalfirði