Ráðherra boðar breytingar á regluverki

Nýjar íbúðir sem byggðar hafa verið með einingalausnum í Víkurhverfi í Stykkishólmi voru kynntar á fjölmennum kynningarfundi á vegum Stólpa í gær á Fosshótelinu í Stykkishólmi. Ragnar Þór Ingólfsson, félags- og húsnæðismálaráðherra, og Jakob Björgvin S. Jakobsson, bæjarstjóri Stykkishólms, ávörpuðu gesti ásamt fulltrúum fyrirtækjanna sem standa að verkefninu. Á fundinum var meðal annars fjallað um hvernig einingabyggingar gætu stuðlað að hagkvæmari og hraðari uppbyggingu íbúðarhúsnæðis, ekki síst á landsbyggðinni.

Verkefni Stólpa við Bauluvík 1 felur í sér tíu íbúðir í tveimur raðhúsum, hver þeirra verður um 45 fermetrar að stærð. Húsin eru hönnuð af Batteríinu arkitektum og framleidd í verksmiðju KOMA Modular í Tékklandi samkvæmt íslenskum byggingarreglum og með tilliti til íslenskra aðstæðna. Heimafyrirtækið Skipavík sá um undirstöður fyrir húsin.

**Ragnar Þór Ingólfsson félags- og húsnæðismálaráðherra ávarpaði fundargesti**

Ráðherra boðar breytingar á regluverki

Ragnar Þór Ingólfsson sagði í ávarpi sínu að lengi hefði gætt efasemda og jafnvel fordóma gagnvart einingabyggingum hér á landi. Hann rifjaði upp reynslu sína af uppbyggingu Bjargs íbúðafélags, meðal annars á Akranesi, þar sem innfluttar húseiningar hefðu sætt gagnrýni en reynslan sýnt fram á hagkvæmni þeirra. Ráðherra lagði sérstaka áherslu á mikilvægi slíkra lausna á landsbyggðinni, þar sem aðgengi að vinnuafli og byggingarverktökum gæti verið takmarkað. Hann sagði jafnframt að regluverk og skipulagslög hefðu hamlað nýsköpun og hraðri uppbyggingu húsnæðis.

„Ég er mjög ánægður með að geta tilkynnt að við erum að gera þessar breytingar,“ sagði ráðherra og greindi frá því að fyrirhugað væri að leggja breytingar á regluverki fram á Alþingi á næsta ári. Þær ættu að greiða fyrir nýjum lausnum í húsnæðisuppbyggingu. Ráðherra gagnrýndi einnig mikinn kostnað við opinberar byggingaframkvæmdir, sem færu oft langt fram úr upphaflegum áætlunum. Hann taldi einingabyggingar geta verið mikilvægan þátt í að ná betri tökum á þeim kostnaði. „Ég er ekki í nokkrum vafa um að þetta sé framtíðin,“ sagði Ragnar Þór og hvatti til aukinnar samvinnu um þróun og nýtingu slíkra byggingalausna.

Börkur Grímsson, viðskiptafræðingur og forstjóri Stólpa stýrði fundinum (fimmti frá hægri), ásamt framsögumönnum, fulltrúum Koma, Batterísins arkitektastofu og öðrum sem stóðu að verkefninu

Mikil uppbygging í Víkurhverfi

Jakob Björgvin S. Jakobsson bæjarstjóri sagði húsnæðismál eitt mikilvægasta viðfangsefni sveitarfélaga. Nauðsynlegt væri að tryggja fjölbreytt framboð húsnæðis fyrir ungt fólk, aðflutta íbúa og þá sem vildu minnka við sig. Hann rakti uppbyggingu Víkurhverfis, þar sem 34 íbúðir hefðu risið á undanförnum árum, þar af tólf almennar leiguíbúðir á vegum Brákar íbúðafélags. Þá minnti hann á samkomulag sveitarfélagsins við ríkið og Húsnæðis- og mannvirkjastofnun frá árinu 2024 um að skapa skilyrði fyrir byggingu um 60 íbúða á fimm árum.

„Við viljum að þeir sem eiga hér heima geti fundið húsnæði við sitt hæfi og þeir sem vilja flytja hingað fái tækifæri til þess einnig,“ sagði Jakob. Hann taldi verkefni Stólpa mikilvæga viðbót við húsnæðisframboðið og sagði áhugavert að skoða nýjar byggingaraðferðir sem gætu stytt framkvæmdatíma og lækkað kostnað, án þess að slakað væri á gæðum.

**Fulltrúar Koma Modul frá Tékklandi. Frá vinstri: Filip Kovác sölustjóri til 25 ára, Ing. Stanislav Martinec, forstjóri, og Marian Navkatil, aðstoðarforstjóri**

Áhersla á vandaða hönnun og hagkvæmni

Börkur Grímsson, forstjóri Stólpa, sagði markmiðið frá upphafi hafa verið að þróa litlar, hagkvæmar og vandaðar íbúðir þar sem íbúum liði vel. Mikil vinna hefði farið í undirbúning og hönnun í samstarfi við Batteríið arkitekta. „Við teljum mun ódýrara að gera mistök á teikniborðinu en í byggingunni sjálfri,“ sagði Börkur og lagði áherslu á mikilvægi vandaðs undirbúnings.

Fulltrúi Batterísins fór yfir hönnun húsanna og útskýrði hvernig hver íbúð væri samsett úr þremur einingum. Sérstök áhersla hefði verið lögð á góða rýmisnýtingu, birtu og sveigjanleika í útfærslu húsanna. Með mismunandi uppröðun eininganna væri hægt að skapa fjölbreyttari og fallegri byggð í stað einsleitra húsalengja.

Filip Kovác, sölustjóri KOMA Modular, kynnti í stuttu máli starfsemi fyrirtækisins og reynslu þess af framleiðslu einingabygginga. Hann sagði um 90% framleiðslunnar fara fram í verksmiðju og aðeins minni hluta vinnunnar á byggingarstað. Fyrirtækið hefði á undanförnum árum öðlast mikilvæga reynslu af íslenskum byggingakröfum í samstarfi við íslenska hönnuði og sérfræðinga.

Að kynningum loknum gafst gestum kostur á að skoða nýju íbúðirnar og kynna sér þær lausnir sem þar hafa verið útfærðar. Vonir standa til að verkefnið geti orðið fyrirmynd að sambærilegri húsnæðisuppbyggingu víðar um land.

**Litið inn í húsið sem lengst var komið í uppbyggingu. Það er bjart og vistlegt í stofunni**

**Húsin koma fullbúin til landsins. Þá er bara eftir að byggja undirstöður og tengja vatn, hita og rafmagn**

Nýjar húsnæðislausnir kynntar í Stykkishólmi

Ráðherra boðar breytingar á regluverki

Ráðherra boðar breytingar á regluverki