Bæjarstjórn Sveitarfélagsins Stykkishólms samþykkti á fundi sínum í gær tillögu um verulegar launalækkanir kjörinna fulltrúa og aukið aðhald í rekstri sveitarfélagsins næstu tvö árin. Laun bæjarfulltrúa lækka um 50% á næsta ári og laun forseta bæjarstjórnar um 80%. Jafnframt er stefnt að varanlegum afkomubata upp á 80–100 milljónir króna á ári, sem komi að fullu fram árið 2028. Tillagan er lögð fram af Birni Ásgeiri Sumarliðasyni, forseta bæjarstjórnar, og felur meðal annars í sér að laun bæjarfulltrúa vegna starfa í bæjarstjórn og bæjarráði lækki tímabundið frá 1. janúar til ársloka 2027. Lækkunin nær bæði til fastra mánaðargreiðslna og fundarlauna. Þá verður gengið frá samkomulagi við Jakob Björgvin Sigríðarson Jakobsson bæjarstjóra um launalækkun sem nemur sömu krónutölu og meðaltalslækkun launa bæjarfulltrúa. Í greinargerð með tillögunni kemur fram að eðlilegt sé að kjörnir fulltrúar leggi sitt af mörkum þegar kallað er eftir auknu aðhaldi og endurskoðun útgjalda hjá stofnunum sveitarfélagsins. Með því vilji þeir sýna gott fordæmi og leggja sitt af mörkum til að styrkja fjárhag þess.

Vilja styrkja reksturinn til framtíðar

Í samtali við Skessuhorn, að loknum bæjarstjórnarfundi, sagði Jakob Björgvin bæjarstjóri að aðgerðirnar væru fyrst og fremst hugsaðar til að treysta rekstur sveitarfélagsins til framtíðar en ekki viðbrögð við bráðum fjárhagsvanda. „Við erum réttum megin við allar kennitölur í dag,“ sagði Jakob og lagði áherslu á að sveitarfélagið væri ekki í neinni neyðarstöðu. Hins vegar væri mikilvægt að styrkja A-hluta rekstrarins, sem nær meðal annars til skóla-, íþrótta- og menningarmála og er að mestu fjármagnaður með skatttekjum. Jakob benti á að sveitarfélagið nyti enn sameiningarframlags upp á um 60 milljónir króna árlega. Mikilvægt væri að búa reksturinn undir breyttar aðstæður og tryggja að hann stæði traustum fótum þegar fram í sækti. Viðvarandi verðbólga og aukinn fjármagnskostnaður hefðu jafnframt kallað á aukna varfærni.

Endurskoða þjónustu og draga úr kostnaði

Megináhersla aðhaldsaðgerðanna verður á lækkun rekstrarkostnaðar, meðal annars með endurskoðun stöðugilda, mönnunar og þjónustustigs. Bæjarráði hefur verið falið að vinna áfram að útfærslu og kostnaðarmati aðgerða í samstarfi við bæjarstjóra og forstöðumenn stofnana. Jakob sagði ekki útilokað að einhverjar breytingar yrðu á þjónustu sveitarfélagsins, en áherslan væri á að fara varlega og verja mikilvæga þjónustu við íbúana. Meðal annars yrði skoðað hvort sveitarfélagið veitti á einhverjum sviðum meiri þjónustu en almennt tíðkaðist annars staðar. Hann minnti á að þegar hefði verið unnið að hagræðingu undanfarin ár, meðal annars með fækkun stöðugilda og skipulagsbreytingum. Nú væri ætlunin að halda þeirri vinnu áfram með skýr markmið næstu tvö árin.

Engin ný lántaka næstu tvö ár

Samkvæmt samþykkt bæjarstjórnar verður jafnframt miðað við að sveitarfélagið taki engin ný lán árin 2027 og 2028. Fjárfestingar munu því ráðast af fjárhagslegu svigrúmi eftir afborganir lána og aðrar skuldbindingar. Sala eigna gæti þó aukið svigrúmið ef þörf krefði. Jakob sagði sveitarfélagið hafa verið í töluverðum fjárfestingum undanfarin ár, meðal annars vegna uppbyggingar nýs íbúðahverfis og framkvæmda við skólann í tengslum við fjölgun íbúa. Nú væri komið að því að hægja tímabundið á framkvæmdum og beina kröftunum að því að styrkja reksturinn. Bæjarstjórinn lagði áherslu á að ekki stæði til að ráðast í róttækar breytingar heldur vinna markvisst að aukinni hagkvæmni og ábyrgum rekstri. Launalækkanir bæjarfulltrúa og bæjarstjóra væru liður í því sameiginlega átaki og skýr skilaboð um að allir þyrftu að leggja sitt af mörkum. Markmiðið væri að sveitarfélagið gæti áfram veitt íbúum góða þjónustu, án þess að fjárhagsleg staða þess yrði áhyggjuefni til framtíðar.

Bæjarfulltrúar í Stykkishólmi lækka laun sín