Þýski tónlistarhópurinn Ensemble WAKS kemur fram á tónleikum á vegum Kalman – tónlistarfélags Akraness í Vinaminni fimmtudaginn 29. október kl. 20. Á efnisskránni er Sofia’s Travels, fjölbreytt og áhrifamikil tónlistardagskrá þar sem jiddísk tónlist, sögulegar upptökur, nýjar útsetningar og frumsamin tónlist fléttast saman við frásögn og margmiðlun.

Ensemble WAKS skipa Inge Mandos, söngur og upplestur, Hans-Christian Jaenicke, fiðla, og Klemens Kaatz, píanó og harmonikka. Auk þeirra fá gamlar raddir af vaxhólkum að hljóma á ný og tengja þannig fortíð og nútíð á einstakan hátt.

Sofia’s Travels sækir innblástur í ævi og störf sovésk-jiddísku tónlistarþjóðfræðingsins Sofiu Magid (1892–1954). Hún áttaði sig á því að jiddísk söng- og tónlistarhefð í Austur-Evrópu ætti á hættu að glatast. Vopnuð hljóðrita og vaxhólkum ferðaðist hún um Úkraínu og Hvíta-Rússland og varðveitti raddir og söng jiddískra söngvara fyrir komandi kynslóðir.

Lögin sem Sofia safnaði í samfélögum sem höfðu orðið illa úti í borgarastyrjöld, ofsóknum og hungri bera með sér sterkar sögur fólks og tíma. Ensemble WAKS hefur endurskapað fjórar af ferðum hennar og fléttar saman lögunum sem hún varðveitti, eigin tónsmíðum hópsins, nútímalegum útsetningum, upprunalegum hljóðritum og upplestri úr ímyndaðri ferðadagbók Sofiu. Myndvörp og hljóðupptökur bæta enn einu lagi við frásögnina og færa raddir horfins heims inn í nútímann.

Tónleikarnir eru á vegum Kalman – tónlistarfélags Akraness. Miðaverð er kr. 5.500 og miðasala er við innganginn.

–fréttatilkynning

Þýskur tónlistarhópur á næstu tónleikum Kalmans