Umfangsmiklar endurbætur hafnar á húsinu

Gamla Landsbankahúsið við Suðurgötu 57 á Akranesi fær nýtt hlutverk þegar því verður breytt í hótel með 22 herbergjum. Framkvæmdir standa nú yfir og stefnt er að því að fyrstu hlutar hótelsins geti tekið til starfa næsta sumar. Jafnframt leita eigendurnir að rekstraraðila fyrir veitingastað, kaffihús eða aðra þjónustu á jarðhæðinni. Hraun fasteignafélag ehf. keypti húsið af Akraneskaupstað í janúar síðastliðnum. Blaðamaður Skessuhorns leit við í síðustu viku og ræddi við þá Guðjón Pétur Lýðsson og Ívar Frey Sturluson, sem fara fyrir uppbyggingunni. Guðjón Pétur hefur yfirumsjón með framkvæmdunum en Ívar Freyr heldur utan um fjármál og rekstur verkefnisins.

Fyrst þarf að koma húsinu í gott stand

„Markmiðið er að gera húsið vel upp og búa það undir nýtt hlutverk,“ segir Guðjón Pétur, sem er ættaður frá Blönduósi og hefur mikla reynslu af endurgerð eldri bygginga. „Við ætlum að endurnýja ofna og ofnalagnir, neysluvatnslagnir og fráveitu þannig að allt þetta verði nýtt. Síðan stefnum við að því, vonandi í samstarfi við SF smiði, að skipta um alla glugga hússins. Það verður eitt stærsta verkefnið í þessum fyrsta áfanga.“

Ívar Freyr, sem á ættir að rekja til Bíldsfells í Grímsnes- og Grafningshreppi, segir að framkvæmdirnar snúist nú að verulegu leyti um að leggja grunn að áframhaldandi uppbyggingu. Unnið sé að niðurrifi innanhúss, endurnýjun lagna og lagfæringum á ytra byrði hússins. Meðal annars þurfi að bæta frárennsli og rakavarnir, ljúka frágangi við þak og tryggja að húsið verði þétt. „Við erum í raun að vinna í grunninum, bæði innanhúss og á ytra byrði hússins. Það þarf að tryggja að allt sé í lagi áður en lengra er haldið,“ segir hann.

**Búið er að fjarlægja gamla dúkinn á annarri hæðinni og hafist er handa við að stúka rýmið niður**

Vonast til að opna næsta sumar

Guðjón segir markmiðið vera að hefja hótelrekstur á annarri og þriðju hæð hússins næsta sumar. Þar er áformað að innrétta 22 rúmgóð hótelherbergi. „Þetta er glæsilegt hús og mikil bæjarprýði. Nú er komið að því að nýta möguleikana sem það býður upp á og fá hér aftur líflega starfsemi,“ segir Guðjón.

Ívar Freyr tekur undir það en vill fara varlega í að lofa ákveðinni opnunardagsetningu. „Við stefnum að því að taka fyrstu hótelherbergin í notkun næsta sumar, mögulega í júlí. Framkvæmdirnar fara fram í áföngum og opnunin ræðst af framvindunni. Við viljum vanda til verka og opna þegar aðstaðan er tilbúin.“ Hann segir þó ljóst að markmiðið sé að koma starfsemi í húsið á næsta ári, þótt einhver hluti framkvæmdanna kunni að dragast fram á haustið.

Leita að rekstraraðila á jarðhæðina

Samhliða uppbyggingu hótelsins leita eigendurnir að rekstraraðila sem sér tækifæri í að koma upp veitingastað, kaffihúsi eða annarri þjónustu á jarðhæðinni. Þeir eru opnir fyrir ólíkum hugmyndum sem falla að húsinu, hótelrekstrinum og mannlífinu við Akratorg. Markmiðið er að þar verði lifandi starfsemi sem höfði bæði til heimafólks og gesta bæjarins. Í kjallara er meðal annars gert ráð fyrir iðnaðareldhúsi og líkamsræktaraðstöðu í fyrrum peningageymslu bankans. Áhugasamir rekstraraðilar geta haft samband við Ívar Frey Sturluson í síma 690 6360 til að ræða möguleikana.

**Landsbankahúsið stendur við Akratorg í hjarta miðbæjarins og útsýnið er frábært. Gert er ráð fyrir að upprunalegu stólarnir sem þarna sjást verði varðveittir**

Veislusalur fyrirhugaður á nýrri efstu hæð

Áformin ná lengra en til endurbóta á þeim hæðum sem fyrir eru. Í nýju deiliskipulagi er gert ráð fyrir að byggð verði fjórða hæð ofan á húsið. Þar vilja eigendurnir koma upp glæsilegum veislusal sem gæti nýst fyrir fjölbreytta viðburði. „Þetta er hugsað í áföngum. Fyrst viljum við koma húsinu sjálfu í gang, en síðan er planið að fara í uppbyggingu veislusalar á efstu hæðinni, hugsanlega eftir eitt til tvö ár. Það gæti orðið alveg stórglæsilegt,“ segir Guðjón.

Húsið kom skemmtilega á óvart

Eigendur segja bygginguna vel hafa staðist tímans tönn. Ívar Freyr segir þakið til að mynda í mun betra ástandi en þeir hafi átt von á. „Það er í raun ótrúlega margt í þessu húsi sem er enn í mjög góðu standi. Auðvitað þarf að sinna viðhaldi og lagfæra ýmislegt, en grunnurinn er frábær.“ Hann hrósar jafnframt hönnun hússins og segir að arkitektinn, Ormar Þór Guðmundsson, hafi greinilega hugsað vel fyrir framtíðarnýtingu þess. „Lagnaleiðirnar og opnu rýmin auðvelda okkur að laga húsið að nýrri starfsemi. Það er greinilegt að vel hefur verið hugsað um hönnun þess.“

Ívar Freyr segir staðsetningu hússins í hjarta Akraness enn fremur mikinn kost. Markmiðið sé að varðveita sem mest af sérkennum hússins og því yfirbragði sem bæjarbúar þekkja. „Við ætlum að halda eins miklu og við getum af upprunalegu útliti þess. Auðvitað verður eitthvað að breytast, en vonandi sem minnst. Þetta er virkilega glæsileg bygging og hún býður upp á mikla möguleika.“

**Sjónsteypulistaverkin, sem eru áberandi einkenni hússins, verða einnig varðveitt**

Hefur áður gert upp gömul hús

Guðjón Pétur er ekki að ráðast í sitt fyrsta verkefni af þessu tagi. Hann hefur áður komið að endurgerð gamalla húsa, m.a. fyrrverandi Landsbankahúss í Vestmannaeyjum sem var breytt í íbúðir og annarri byggingu á Neskaupsstað sem var breytt í gistiheimili. Ívar Freyr segir þessa reynslu afar verðmæta í verkefninu á Akranesi. Sjálfur hefur hann einnig komið að uppbyggingu fasteigna um árabil og segir eigendurna vinna náið saman, þótt verkaskiptingin sé nokkuð skýr. „Guðjón heldur utan um framkvæmdirnar en ég sé meira um fjármálin, bókhaldið og heildaryfirsýnina. Við vinnum þetta samt mjög mikið saman. Ég segi stundum að mitt hlutverk sé að halda á regnhlífinni,“ segir hann og brosir.

Finna fyrir miklum stuðningi bæjarbúa

Þeir félagar segja viðbrögð bæjarbúa við framkvæmdunum hafa verið afar jákvæð. Margir hafi fylgst með húsinu um árabil og vilji gjarnan sjá það öðlast nýtt hlutverk í bæjarlífinu. „Við höfum fundið fyrir miklum stuðningi og viljum auðvitað sýna í verki að við ætlum að gera þetta vel. Þetta er flókið og kostnaðarsamt verkefni og margt þarf að ganga upp. En við teljum okkur hafa reynsluna sem þarf til að koma þessu áfram með góðum hætti,“ segir Ívar Freyr.

Guðjón tekur undir það og leggur áherslu á að húsið nýtist á ný. „Þetta er einfaldlega glæsilegt hús og bæjarprýði. Nú ætlum við að koma því aftur í gott stand og sjá til þess að það verði nýtt,“ segir Guðjón Pétur að lokum.

Nýtt líf færist í gamla Landsbankahúsið á Akranesi

Umfangsmiklar endurbætur hafnar á húsinu

Umfangsmiklar endurbætur hafnar á húsinu