Áætlunin gerir ráð fyrir fjölgun starfa um allt að 40

Unnur Brá Konráðsdóttir sveitarstjóri Borgarbyggðar og Björn Ingi Victorsson, forstjóri Steypustöðvarinnar, undirrituðu síðastliðinn föstudag samkomulag um stækkun lóðar fyrirtækisins í Borgarnesi. Samningurinn markar mikilvægt skref í fyrirhugaðri uppbyggingu Steypustöðvarinnar, en áætlanir gera ráð fyrir að verksmiðjan verði stækkuð um 5.500 fermetra á næstu árum. Gangi áformin eftir gætu við uppbygginguna skapast 35 til 40 ný störf í Borgarnesi.

Undirbúningur samningsins hefur staðið yfir um nokkurt skeið og felur hann í sér að Steypustöðin fær aukið landrými í beinu framhaldi af núverandi lóð fyrirtækisins í átt til Kárastaða. Í framhaldinu verður unnið að deiliskipulagi og nánari útfærslu lóðarinnar. Jafnframt verður tryggt aðgengi Rarik að spennistöð á svæðinu. Sveitarstjórn Borgarbyggðar samþykkti fyrr á árinu afslátt af gatnagerðargjöldum vegna uppbyggingarinnar, á grundvelli lagaheimildar sem ætlað er að stuðla að atvinnuuppbyggingu í sveitarfélaginu.

Björn Ingi segir í samtali við Skessuhorn stækkunina hafa verulega þýðingu fyrir starfsemi og framtíð fyrirtækisins. Með henni skapist möguleikar á að sameina starfsemi sem nú fer fram á tveimur stöðum. Það muni auka hagræði, draga úr flutningum milli starfsstöðva og bæta öryggi, meðal annars með minni umferð yfir þjóðveg 1. Unnur Brá Konráðsdóttir fagnaði samkomulaginu og segir það mikilvægt fyrir atvinnulíf og framtíðaruppbyggingu í Borgarnesi. Stækkunin styrki stöðu Steypustöðvarinnar í sveitarfélaginu og sé jafnframt skýr vísbending um trú fyrirtækisins á framtíð svæðisins. „Þetta er líka yfirlýsing um að stór fyrirtæki hafi trú á þessu samfélagi,“ sagði Unnur Brá og benti á að fjölgun starfa geti bæði skapað ný tækifæri fyrir heimamenn og laðað fleira fólk til búsetu í sveitarfélaginu. Bæði lýstu þau ánægju með niðurstöðu samningaviðræðnanna. Framkvæmdir og fjölgun starfa eru þó háð því að fyrirhuguð uppbygging gangi eftir samkvæmt áætlun.

**Steypustöðin hefur nú fengið úthlutað lóð fyrir stækkun athafnasvæðisins í Borgarnesi.**

Viðstaddir undirritun samnings. Frá vinstri: Andrés Konráðsson, framkvæmdastjóri Einingaverksmiðju Borgarness, Björn Ingi Victorsson, forstjóri Steypustöðvarinnar, Jovana Pavlovic, forseti sveitarsjórnar, Unnur Brá Konráðsdóttir, sveitarstjóri Borgarbyggðar og Sigurður Guðmundsson, formaður byggðarráðs

**Líkan að stækkun húsnæðisins. Viðbótarálma verður byggð norðan við núverandi verksmiðjuhús. Þar verða auk framleiðslurýmis nýjar skrifstofur**

Steypustöðin hyggur á 5.500 fermetra stækkun í Borgarnesi

Áætlunin gerir ráð fyrir fjölgun starfa um allt að 40

Áætlunin gerir ráð fyrir fjölgun starfa um allt að 40