Skagamenn sýndu seiglu og unnu upp tveggja marka forskot Víkings þegar liðin skildu jöfn, 2:2, á Víkingsvelli í Fossvogi í gærkvöldi. Leikurinn var liður í 25. umferð Bestu deildar karla, en Víkingar höfðu þegar tryggt sér Íslandsmeistaratitilinn. ÍA er áfram í fimmta sæti deildarinnar og heldur í vonina um Evrópusæti.

Heimamenn hófu leikinn af miklum krafti og komust yfir strax á sjöundu mínútu. Árni Marinó Einarsson, markvörður ÍA, misreiknaði þá skopp boltans eftir sendingu til baka frá Guðmundi Þórarinssyni. Valdimar Þór Ingimundarson nýtti sér mistökin og kom Víkingum yfir. Aðeins tíu mínútum síðar tvöfaldaði Aron Elís Þrándarson forystuna þegar hann fylgdi eftir hornspyrnu og kom boltanum yfir marklínuna. Skagamenn létu mótlætið ekki slá sig út af laginu og unnu sig smám saman inn í leikinn. Á 36. mínútu átti Gísli Eyjólfsson góða sókn upp hægri kantinn og lagði boltann út í teiginn þar sem Markús Páll Ellertsson skoraði með viðstöðulausu skoti. Staðan var því 2:1 í hálfleik.

ÍA hélt áfram að sækja eftir hlé og uppskar jöfnunarmark á 53. mínútu. Gísli Laxdal sendi þá fasta aukaspyrnu inn í vítateig Víkings þar sem Peter Oliver Ekroth varð fyrir því óláni að beina boltanum í eigið mark. Þar með var staðan orðin 2:2 og Skagamenn búnir að vinna upp tveggja marka forskot heimamanna. Fleiri mörk voru ekki skoruð og liðin skiptu því stigunum á milli. Úrslitin verða að teljast sanngjörn þótt Víkingar hafi verið mun sterkari í upphafi. Markús Páll Ellertsson var meðal bestu manna ÍA og reyndist varnarmönnum Víkings erfiður viðureignar.

Þegar tveimur umferðum er ólokið eru Skagamenn í fimmta sæti, tveimur stigum á eftir Breiðabliki sem lagði Keflavík að velli í sömu umferð. Baráttan um Evrópusæti er því enn opin og mikið undir í síðustu leikjum tímabilsins.

Skagamenn sóttu stig í Fossvoginn eftir erfiða byrjun