„Ein æfing á dag fyrir betri heilsu“ – í nýju hreyfidagatali

Sjúkraþjálfararnir Hildur Aðalbjörg Ingadóttir og Svandís Björk Guðmundsdóttir hafa gefið út hreyfidagatal fyrir eldra fólk þar sem einfaldleikinn er hafður að leiðarljósi; ein æfing á dag sem tekur aðeins örfáar mínútur. Markmiðið er að lækka þröskuldinn að reglulegri hreyfingu og ná sérstaklega til þeirra sem eiga erfitt með að taka fyrstu skrefin.

Útgáfu dagatalsins var fagnað í Pennanum á Akranesi á dögunum og þar var heldur betur líf í tuskunum þegar blaðamaður Skessuhorns leit við. Gestir létu ekki sitt eftir liggja heldur prófuðu æfingar undir leiðsögn þeirra Hildar og Svandísar. „Þetta er afrakstur tæplega tveggja ára vinnu og það er virkilega ánægjulegt að sjá dagatalið loksins komið út og í sölu,“ segir Hildur. Hægt er að nálgast Hreyfidagatalið í verslunum Pennans og hjá Landssambandi eldri borgara.

**Markmiðið með Hreyfidagatalinu er einfaldlega að koma heilsueflingunni inn á heimilin**

Þröskuldurinn gerður eins lágur og hægt er

Hildur og Svandís eru báðar sjúkraþjálfarar og kynntust í gegnum störf sín innan Félags sjúkraþjálfara í öldrunarþjónustu, þar sem þær sitja í stjórn. Báðar hafa þær mikla reynslu af öldrunarþjónustu og þar kviknaði hugmyndin að því að útbúa einfalt verkfæri til að hvetja eldra fólk til daglegrar hreyfingar. „Við vildum lækka þröskuldinn eins mikið og hægt væri og ná líka til þeirra sem eru viðkvæmastir og hreyfa sig lítið. Þess vegna ákváðum við að hafa aðeins eina æfingu á dag. Hún á að vera aðgengileg fyrir sem flesta, krefst hvorki tækja né sérstaks búnaðar og við sýnum bæði auðveldari og erfiðari útfærslur,“ segir Svandís. Æfingarnar eru stuttar og að jafnaði er miðað við eina til þrjár umferðir og um tíu endurtekningar. Dagleg hreyfing samkvæmt dagatalinu ætti því sjaldnast að taka meira en fimm mínútur. „Maður hefur allan daginn til að finna þessar örfáu mínútur,“ segir Hildur.

**Hildur og Svandís fengu gesti til að gera léttar æfingar á staðnum**

Styrkur, jafnvægi og heilaleikfimi

Dagatalið er gormabók og ekki bundið ákveðnu ári. Því má byrja að nota það hvenær sem er og nýta aftur ár eftir ár. Áhersla er lögð á styrk og jafnvægi, enda mikilvægir þættir þegar kemur að heilsueflingu og forvörnum meðal eldra fólks. Æfingarnar eru þó fjölbreyttar. Inn á milli eru meðal annars liðleika- og þolæfingar, færniþjálfun og heilaleikfimi. Þá er fræðslu fléttað inn í dagatalið. „Við vildum hafa þetta fjölbreytt og skemmtilegt. Fræðslan skiptir líka miklu máli því stór hluti sjálfshjálpar felst í því að fólk hafi upplýsingar og þekkingu til að styðja við eigin heilsu,“ segir Hildur.

**Gestir létu ekki sitt eftir liggja heldur prófuðu æfingar undir leiðsögn þeirra Hildar og Svandísar. Hér eru þeir að taka þátt í einfaldri en áhrifaríkri öndunaræfingu**

Tveggja ára sjálfboðavinna

Hildur útskrifaðist sem sjúkraþjálfari árið 2009 og hefur lengst af starfað á sviði öldrunarþjónustu. Svandís útskrifaðist árið 2019 en hafði þá þegar hafið störf við öldrunarþjónustu tveimur árum fyrr. Vinnan við hreyfidagatalið hefur tekið hátt í tvö ár og segja þær verkefnið að mestu hafa verið unnið í sjálfboðavinnu. „Þetta er fyrst og fremst hugsjón. Markmiðið hefur alltaf verið mjög skýrt og við höfum báðar mikla ástríðu fyrir þessu. Við sjáum líka hversu gagnlegt svona verkfæri getur verið, bæði fyrir eldra fólk, aðstandendur og okkur sem störfum við fagið,“ sögðu þær stöllur.

Hugmyndin tengist jafnframt fyrra verkefni Hildar, „Væntumþykju í verki,“ þar sem aðstandendur voru hvattir til að styðja eldra fólk til heilsueflingar. Hreyfidagatalið færir þá hugmynd enn frekar inn á heimilin og gerir fólki kleift að byrja smátt. Viðtökurnar hafa að sögn þeirra verið vonum framar þótt dagatalið sé nýkomið á markað. Fólk hafi sýnt öðrum eintökin sín og þannig hafi áhuginn breiðst út. „Það komu líka margir fagaðilar að verkefninu með okkur og mikil vinna liggur að baki. Kápan selur vissulega, en innihaldið svo sannarlega líka,“ segir Hildur.

Verkefnið nýtur stuðnings Félags sjúkraþjálfara, Landssambands eldri borgara og Farsællar öldrunar. Vesturland á auk þess sína fulltrúa í verkefninu því Svandís er Borgnesingur og Hildur er búsett á Akranesi. Svandís segir boðskap dagatalsins í raun afar einfaldan. Enginn þurfi að byrja á stórum æfingaáætlunum eða löngum æfingum. „Mitt mottó í þessu öllu saman er að allt er betra en ekkert. Byrjaðu bara á einni æfingu á dag. Þetta tekur í mesta lagi fimm mínútur. Markmiðið er einfaldlega að koma heilsueflingunni inn á heimilin,“ segir Svandís.

Gaui litli er dyggur stuðningsmaður, vinur og leiðbeinandi verkefnisins hjá Hildi og Svandísi. Hann hlaut „bikar“ í þakkargjöf, en drullusokkurinn er öflugt tæki til bandvefslosunar og ætti að vera til á hverju heimili

**Gestum var skemmt yfir þessu uppátæki Hildar og Svandísar**

**Kökukeflið má nota til ýmissa annarra hlut en að baka, svo sem að mýkja stirða vöðva**

Vilja koma heilsueflingu inn á heimilin

„Ein æfing á dag fyrir betri heilsu“ - í nýju hreyfidagatali

„Ein æfing á dag fyrir betri heilsu“ - í nýju hreyfidagatali