Stefnir að 29 tónleikum í 12 mismunandi húsum á einni kvöldstund

Hin árlega tónlistarhátíð Heima – Skagi fer fram laugardaginn 31. október næstkomandi. Um er að ræða hátíð sem fram fer í 12 heimahúsum en sú nýbreytni verður að þessu sinni að lokatónleikar hátíðarinnar með Á móti sól fara fram í iðnaðarhúsnæði Kapp við Krókalón. Ólafur Páll Gunnarsson hefur frá 2019 verið skipuleggjandi hátíðarinnar. Hann segir aldrei fleiri atriði hafi verið í boði, eða 15 hljómsveitir eða atriði á samtals 29 tónleikum á sex klukkustunda dagskrá Heima – Skaga. Sú nýbreytni verður að þessu sinni að föstudagskvöldið 30. október verða tónleikar í Þorpinu á Akranesi þar sem frítt verður inn fyrir 13-18 ára ungmenni. Þeir tónleikar eru liður í Barnamenningarhátíð Vesturlands sem stendur yfir allan októbermánuð. Þar munu koma fram Skagabandið Jaðrakan, Dóri og Döðlurnar og Karólína Orradóttir.

Allskonar skemmtilegt

„Heima – Skagi er tónlistarhátíð sem ég hef staðið fyrir undanfarin ár í tengslum við menningarhátíð Skagamanna – Vökudaga. Þeir verða að þessu sinni frá 22. október til 1. nóvember. Nú verða á einu Heima – Skaga kvöldi fluttir alls 29 tónleikar í 12 mismunandi húsum. Við leggjum áherslu á mjög fjölbreytta tónlist; popp, rokk, rapp, jazz, soul, folk, heimstónlist, klassík og í raun hvað sem er, ef það er áhugavert og skemmtilegt. Stærsta breytingin frá því í fyrra er að upphaf og endir Heima – Skaga mun fara fram í einu af húsum fyrirtækisins KAPP sem er aðal styrktaraðili hátíðarinnar að þessu sinni. Í KAPP verður hátíðin sett með formlegum hætti og henni verður líka slitið þar með skemmtilegum lokatónleikum þegar dagskránni í heimahúsunum verður lokið. Þar verður því aðal svið hátíðarinnar. Í KAPP húsinu munu verða fimm hljómsveitir eða atriði í það heila. En það verður spilað út um allan bæ og meðal annars í gamla Arnardals húsinu við Kirkjubraut 48, líkt og í fyrra. Þar verða armböndin líka afhent á hátíðardaginn sjálfan frá klukkan 13-17, auk þess sem ýmislegt skemmtilegt verður í gangi, svo sem matur, myndlist og fleira.“

**Nándin er oft mikil þegar spilað er í heimahúsum. Meðfylgjandi mynd er frá Heima – Skaga 2022. Ljósm. Guðni Hannesson**

Á móti sól lýkur kvöldinu

Óli Palli segir að Heima – Skagi verði sem fyrr einstök hátíð þar sem nándin við listafólkið er mikil. Vonast hann til að selja a.m.k. 350 armbönd á hátíðina. Óli Palli segir að fyrsta Heima – Skaga hátíðin hafi verið haldin 2019 með sex atriðum og alltaf hafi selst upp í þau fimm skipti sem hátíðin hefur farið fram. Hlé varð á henni í Covid-19 tímabilinu. „Sveitin, sem er gamla Skólahljómsveit Akraness, 30 manna lúðrasveit undir stjórn Andrésar Helgasonar, mun opna hátíðina klukkan 18.00 í KAPP húsinu við Krókalón. Það er mögulegt að gestur eða tveir muni syngja með Sveitinni. Dagskráin í heimahúsunum hefst svo kl. 19 og stendur til 22.30. Lokatónleikar Heima – Skaga verða svo með hljómsveitinni Á móti sól og hefjast stundvíslega kl. 23.00.“

Miðasala á hátíðina er á tix.is og í Pennanum Eymundsson á Akranesi.

Tónlistarhátíðin Heima Skagi hefur aldrei verið stærri

Stefnir að 29 tónleikum í 12 mismunandi húsum á einni kvöldstund

Stefnir að 29 tónleikum í 12 mismunandi húsum á einni kvöldstund