Á fyrstu átta mánuðum þessa árs nam útflutningsverðmæti sjávarafurða, að fiskmeti meðtöldu, um 253 milljörðum króna. Það jafngildir ríflega 39% af verðmæti alls vöruútflutnings á tímabilinu. Þetta kemur fram í Radarnum, vefriti SFS. Útflutningsverðmæti sjávarafurða jókst um rúmlega 7% í krónum talið frá sama tímabili í fyrra. Að teknu tilliti til gengisbreytinga er aukningin aðeins meiri, eða rúm 8%, enda hefur gengi krónunnar að jafnaði verið rétt um 1% sterkara í ár en á sama tímabili í fyrra.