Körfuboltatímabilið er farið af stað og þrjú lið af Vesturlandi leika í 1. deild karla í vetur; ÍA, Skallagrímur og Snæfell. Skallagrímsmenn riðu á vaðið í gærkvöldi þegar þeir sóttu KV heim á Meistaravelli í Reykjavík. Borgnesingar byrjuðu af miklum krafti en urðu að sætta sig við naumt 84:82 tap eftir spennandi lokamínútur. Skallagrímur hafði undirtökin frá upphafi og vann fyrsta leikhluta 26:14. Gestirnir héldu áfram að bæta við forskotið í öðrum leikhluta og staðan í hálfleik var 52:33, Skallagrími í vil.