Yfir hundrað skólar víða um land taka nú þátt í Svakalegu lestrarkeppninni, lestrarátaki fyrir börn í 1.–7. bekk. Markmiðið er einfalt; að kveikja áhuga barna á lestri og hvetja þau til að lesa meira, bæði í skólanum og heima. Keppnin hófst 15. september og stendur til 6. október. Skólarnir halda utan um hversu lengi nemendur lesa á tímabilinu og skila niðurstöðum að keppni lokinni. Sá skóli sem safnar flestum lestrarmínútum hlýtur titilinn Svakalegasti lestrarskóli landsins auk bókaverðlauna. Úrslitin verða kynnt 15. október.