Fyrsti uppbrotsdagur skólaársins fór fram í Grunnskólanum í Stykkishólmi á föstudaginn. Að þessu sinni var efnt til Litahlaups í tengslum við Norræna skólahlaupið. Byrjað var á léttri og skemmtilegri upphitun áður en hlaupið var ræst. Hlaupið hófst og endaði við skólann og var hringurinn um 1,6 kílómetrar. Á leiðinni voru fimm litastöðvar þar sem litríku litadufti var kastað yfir nemendur. Þeir gátu valið hvort þeir færu einn eða fleiri hringi og hvort þeir gengju, skokkuðu eða hlupu.