„Markmiðið er að undirbúa nemendur fyrir lífið“

Menntaskóli Borgarfjarðar í Borgarnesi fer vel af stað í haust og nemendur hafa aldrei verið fleiri. Ríflega 220 nemendur eru skráðir við skólann, þar af um 50 nýnemar. Um leið hafa nýir nemendagarðar verið teknir í notkun og er þeir fullsetnir. Halldóra Lóa Þorvaldsdóttir, nýr aðstoðarskólameistari, segir mikinn metnað einkenna starfið og að sér hafi strax orðið ljóst hversu sterk áhersla sé lögð á velferð nemenda, færni þeirra og sjálfstæði. Blaðamaður Skessuhorns heimsótti skólann í síðustu viku, ræddi við Halldóru og hitti einnig formann nemendafélagsins, matráð skólans og nokkra nemendur sem eru að stíga sín fyrstu skref í framhaldsskóla og eru jafnframt fyrstu íbúar á nýju heimavistinni sem er til húsa á neðstu hæð í Húsi kynslóðanna við Borgarbraut 63.

**Halldóra Lóa Þorvaldsdóttir aðstoðarskólameistari Menntaskóla Borgarfjarðar á skrifstofu sinni**

Borgfirðingur snýr heim

Halldóra Lóa Þorvaldsdóttir tók við starfi aðstoðarskólameistara MB 4. ágúst síðastliðinn og tók þar við starfi Lilju S. Ólafsdóttur, sem starfað hafði við skólann frá upphafi. Halldóra Lóa er Borgfirðingur, alin upp í Reykholtsdal, fyrst í Reykholti og síðar í Brekkukoti þar sem foreldrar hennar tóku við búi. „Ég er búin að starfa meira og minna innan menntakerfisins síðan 2005 og innan háskólasamfélagsins síðan 2008,“ segir Halldóra Lóa. Hún er með kennsluréttindi, menntuð náms- og starfsráðgjafi og hefur jafnframt lokið stjórnendanámi. Áður en hún kom til Menntaskóla Borgarfjarðar var hún framkvæmdastýra kennslu- og upplýsingatæknisviðs Háskólans á Bifröst.

Starf aðstoðarskólameistara er fjölbreytt. Halldóra Lóa heldur meðal annars utan um námskrárgerð og stundatöflur, vinnur að innleiðingu nýs kennslukerfis og við gæðamál og sinnir kennsluráðgjöf við kennara. Þá kennir hún sjálf einn áfanga. „Ég fór upphaflega markvisst í náms- og starfsráðgjöf en fór síðan svolítið óvænt inn í stjórnun við Háskólann á Bifröst. Það reyndist mjög skemmtilegt og ég finn mig vel í því,“ segir hún.

**Kristján Karl Hallgrímsson, formaður nemendafélags skólans**

Fleiri nemendur en áður

Halldóra Lóa segir skólaárið hafa farið afar vel af stað. Ríflega 220 nemendur séu skráðir við skólann og um 50 nýnemar hafi bæst í hópinn í haust. „Þetta er mjög góð stærð fyrir okkur og fleiri nemendur en hafa verið hér áður, að ég held frá upphafi skólans.“ Námsframboðið er fjölbreytt. Boðið er upp á íþróttafræði, náttúrufræði, félagsfræði og opna braut auk starfsbrautar og framhaldsskólabrautar. Þá er skólinn í samstarfi við Landbúnaðarháskóla Íslands á Hvanneyri um búfræðinám þar sem nemendur taka fyrstu tvö árin í Menntaskóla Borgarfjarðar og ljúka síðan náminu á Hvanneyri sem búfræðingar með stúdentspróf.

Grunngildi skólans eru sjálfstæði, færni og framfarir. Halldóra segir þau endurspeglast vel í daglegu skólastarfi. „Nemendur vinna jafnt og þétt yfir önnina og mikil áhersla er á leiðsagnarmat. Við erum með tvær vörður á hvorri önn þar sem farið er yfir hvernig nemendum gengur. Umsjónarkennarar hitta nemendur og ræða hvað gengur vel og hvar hægt er að bæta sig. Þannig reynum við að grípa inn í strax, leiðbeina þeim og efla sjálfstæð vinnubrögð.“

**Þetta er veisla: Sólrún Káradóttir matráður skólans ber fram girnilega eftirrétti**

Námið fer líka fram úti í náttúrunni

Eitt dæmi um fjölbreytt skólastarf er áfanginn Útivist. Halldóra Lóa fór nýlega með nemendum í tveggja daga ferð þar sem gengið var frá Gljúfurárbrúnni að Langavatni, gist var í leitarmannaskálanum á Torfhvalastöðum og haldið síðan yfir að Hreðavatni. Nemendur þurftu sjálfir að undirbúa ferðina, velja réttan fatnað og búnað og bera með sér þá næringu sem þeir þurftu. „Markmiðið var að þau læri að undirbúa sig fyrir útivist og geti bjargað sér úti í náttúrunni. Þetta er hæfilega krefjandi ferð þannig að langflestir geta skráð sig í þennan valáfanga. „Stemningin var ekki síðri en námið. Sumir tóku með sér veiðistöng og einn fiskur veiddist í Langavatni sem síðar var eldaður og snæddur um kvöldið. Þá tíndu nemendur ber á leiðinni og nutu útiverunnar. Þetta var bara alveg frábært,“ segir Halldóra Lóa.

**Það fer vel á með Sigurði Erni íþróttakennara og nemendum skólans. Sigurður Örn er í hvítri peysu til hægri á myndinni**

Heimavistin strax fullsetin

Stórt skref var stigið í haust þegar ný heimavist skólans var opnuð. Fyrsta hæðin er komin í notkun með tólf eins og tveggja manna herbergjum og þar búa nú 17 nemendur. „Hún er fullsetin og við hefðum getað tekið inn fleiri ef við hefðum haft meira pláss. Þetta er því mjög góð byrjun á þessu verkefni,“ segir Halldóra Lóa. Eftirspurnin sýnir jafnframt hversu mikilvægt húsnæðið er fyrir skóla þar sem nemendur koma víða að. Nýja vistin gerir ungu fólki utan Borgarness kleift að velja skólann án þess að þurfa að ferðast langar leiðir daglega. Halldóra Lóa segir það hafa komið sér skemmtilega á óvart hversu vel nemendur hafi tekið á móti vistinni og hversu fljótt samfélagið hafi myndast þar og þroskast. Sumir kusu einkaherbergi en aðrir vildu deila herbergi og kynnast þannig betur.

Öflugt félagslíf

Félagslífið hefur sömuleiðis farið hratt af stað við skólann. Nýnemaferð og nýnemaball eru þegar að baki og nemendafélagið hefur staðið fyrir opnu húsi. Kristján Karl Hallgrímsson, formaður nemendafélags MB, er frá Vatnshömrum. Hann segir félagslífið hafa verið á uppleið síðustu ár. „Það er alltaf góð stemning. Þátttakan er mjög fín miðað við hvað við erum mörg í skólanum og við reynum að halda því áfram og fá sem flesta með.“ Fimm nemendur sitja í stjórn nemendafélagsins; formaður, gjaldkeri, ritari, skemmtanastjóri og nýnemafulltrúi.

Kristján Karl segir hlutverk formanns meðal annars felast í að vera milliliður milli nemenda og stjórnenda skólans auk þess að skipuleggja viðburði með öðrum í stjórninni. Samstarf framhaldsskólanna á Vesturlandi er einnig mikilvægt. Nemendur Menntaskóla Borgarfjarðar eiga í samstarfi við Fjölbrautaskóla Vesturlands á Akranesi og Fjölbrautaskóla Snæfellinga í Grundarfirði. Í október verður til að mynda „West Side,“ árleg íþróttakeppni skólanna með balli í kjölfarið. Kristján Karl er á sínu þriðja skólaári eftir að hafa áður verið í grunnskóla á Kleppjárnsreykjum. „Mér finnst æðislegt hérna. Þetta er góður félagsskapur, flott fólk og mjög góðir kennarar.“

**Jón Kalman Þorkelsson fyrsta árs nemi frá Búðardal. Skólaárið leggst mjög vel í hann**

„Rusladallurinn segir sína sögu“

Góður matur skiptir ekki síður máli þegar byggja á upp gott skólasamfélag. Sólrún Káradóttir hefur starfað sem matráður við skólann í tæp átta ár og segist enn hlakka til að mæta í vinnuna á morgnana. Hún leggur áherslu á hollan og einfaldan heimilismat og segir nemendurna sjálfa hafa áhrif á matseðilinn. „Ég geri aldrei sama matseðilinn frá mánuði til mánaðar og spyr þau stundum hvað þau langar í. Svo sé ég auðvitað líka á rusladallinum hvað þeim finnst gott. Ég er ekkert að elda mat sem endar þar,“ segir Sólrún og brosir. Daglega er boðið upp á veglegan salatbar með meðal annars grænmeti, ávöxtum, hnetum og baunum. „Ég reyni að hafa þetta hollt en líka einfalt. Venjulegur heimilismatur er oft bara bestur.“

„Það vantar bara nokkra snaga“

Nemendur sem Skessuhorn ræddi við tóku undir það að maturinn væri frábær hjá Sólrúnu. Björn Kalman Þorkelsson úr Búðardal sagði matinn hafa komið sér sérstaklega á óvart. Hann væri „fjölbreyttur, hollur og bragðgóður“ – og gott pasta væri sérstaklega vel þegið. Hann hóf nám við skólann fyrir um mánuði og segir nálægðina við heimahagana hafa ráðið miklu um val á skóla. Hann dvelur á nýju heimavistinni, sem honum líst afar vel á, og er þegar farinn að kynnast flestum sem þar búa. „Aðstaðan er bara frekar góð. Það vantar bara nokkra snaga og þá er hún fullkomin,“ segir Björn léttur í bragði. Það sem hefur helst komið honum á óvart í skólanum eru samskiptin við kennarana. „Kennararnir eru mjög rólegir, þægilegir og hjálpfúsir,“ segir hann og telur gott samband kennara og nemenda skipta gríðarlega miklu máli.

**Kamilla Davíðsdóttir kemur úr Kópavogi en hún valdi Menntaskóla Borgarfjarðar vegna samstarfsins við Landbúnaðarháskólann á Hvanneyri**

Kom úr Kópavogi til að stefna á búskap

Kamilla Davíðsdóttir er úr Kópavogi og er einnig á fyrsta ári. Hún valdi Menntaskóla Borgarfjarðar vegna samstarfsins við Landbúnaðarháskólann á Hvanneyri. Hún stefnir á búfræðinám, tekur fyrstu tvö árin við MB í Borgarnesi og þau síðari við LbhÍ á Hvanneyri. „Ég hef mikinn áhuga á búskap og þetta er rosalega flott nám – og kerfið er mjög gott,“ segir Kamilla. Flutningurinn úr Kópavogi á heimavist í Borgarnesi er stór breyting fyrir ungan nemanda en Kamilla segir aðlögunina hafa gengið vel. „Þetta er rosaleg breyting en maður venst þessu. Það er líka svo gott fólk hérna sem hugsar vel um mann,“ bætir hún við.

**Heiðdís María frá Akranesi býr á einstaklingsherbergi og nýtur sín vel þar sem námið er hentugt og aðstaðan hlýleg að hennar mati**

„Mér líður mjög vel hérna“

Heiðdís María er frá Akranesi. Hún hefði auðveldlega getað valið framhaldsskóla nær heimili sínu en heimsókn í Menntaskóla Borgarfjarðar réði úrslitum. „Ég fór á kynningu hérna og skólinn var bara svo þægilegur og kennararnir mjög næs. Aðstaðan er hlýleg og námið hentaði mér,“ segir hún. Heiðdís er á náttúrufræðibraut og býr í einstaklingsherbergi á heimavistinni. Hún segir það hafa verið mikil viðbrigði að koma beint úr grunnskóla og þurfa að axla meiri ábyrgð. „Það er ábyrgð sem fylgir þessu en þetta er bara geðveikt. Mér líður mjög vel hérna, þetta er mjög kósí og ég er búin að kynnast fullt af nýju fólki.“

Þórunn María Hervarsdóttir frá Lambalæk í Hvalfjarðarsveit deilir herbergi með vinkonu sinni. Öll herbergi eru búin góðri eldunaraðstöðu og þær segjast hæst ánægðar með vistarverurnar

„Allt til alls“ í svítunni

Þórunn María Hervarsdóttir og Katrín Rós Birgisdóttir deila herbergi á vistinni og voru ánægðar með aðstöðuna þegar blaðamann bar að garði. Þær eru báðar frá Lambalæk í Hvalfjarðarsveit. Sjónvarp og helstu nauðsynjar voru komnar á sinn stað. „Við erum með allt til alls,“ sögðu þær léttar í bragði. Nemendahópurinn kemur greinilega víða að, en Katrín er upphaflega frá Reykjanesbæ. Heimavistin gerir þannig nemendum kleift að sækja skóla langt út fyrir hefðbundið nærumhverfi sitt.

**Guðmundur Þór Eggertsson nýtur sín vel á nýju heimavistinni enda herbergi vel búin**

Sjálfstæðið stór hluti af náminu

Guðmundur Þór Eggertsson kemur úr Flókadal í Borgarfirði. Hann er einnig á sínu fyrsta ári og býr á nýju heimavistinni. Hann segir aðstöðuna þar góða, meðal annars vegna þess að nemendur hafi eigin eldunaraðstöðu. „Mér líður mjög vel hérna. Þetta er mjög fín vist og maður getur græjað sér mat þegar maður vill.“ Með frelsinu fylgir þó ábyrgð. Nemendur sjá sjálfir um þrif og Guðmundur segir það ekkert tiltökumál. „Maður skellir bara tónlist á og er búinn með þetta eftir hálftíma,“ segir hann og brosir.

Guðmundur Þór segir breytinguna úr grunnskóla yfir í framhaldsskóla vera mikla. Meiri kröfur séu gerðar til nemenda, en um leið finni hann mikinn stuðning frá kennurum. „Kennararnir hafa mikinn metnað í að kenna manni og vilja að maður standi sig vel. Þeir leggja sig líka fram um að kynnast öllum nemendunum.“ Guðmundur er nýnemafulltrúi í nemendafélaginu og tekur virkan þátt í félagslífinu. Hann æfir jafnframt körfuknattleik með Skallagrími. Að hans mati er dvölin á heimavistinni sjálf mikilvægur hluti af því að þroskast og verða sjálfstæðari. „Að koma að heiman úr grunnskóla og fara að búa á vist er mjög stórt skref. Þetta eykur sjálfstæðið og undirbýr mann fyrir framtíðina, sem er eitt af grunngildum skólans,“ segir hann.

„Nemendur skipta mjög miklu máli“

Þessi orð falla vel að því sem Halldóra Lóa segir vera eitt helsta einkenni skólans. Þótt hún hafi aðeins starfað þar í rúman mánuð segist hún þegar finna sterkt fyrir menningu þar sem nemandinn er í forgrunni. „Ég fyllist bara stolti yfir því að vera komin inn í þennan skóla. Hér er rosalega flottur starfsmannahópur sem lætur sér annt um nemendur. Nemendur skipta mjög miklu máli og reynt er að koma til móts við þá eins og hægt er, en um leið eru gerðar kröfur og lögð áhersla á aga.“ Markmiðið segir hún að undirbúa nemendur fyrir lífið, ekki aðeins með bóknámi heldur með því að efla færni þeirra, sjálfstæði og samskipti. „Mér finnst rosalega gaman að vera komin hingað og ég hlakka mikið til að takast á við það sem fram undan er,“ segir Halldóra Lóa að lokum.

**Salerni og sturta er inni á öllum herbergjum**

Metnaður, mannlíf og ný heimavist í Menntaskóla Borgarfjarðar

„Markmiðið er að undirbúa nemendur fyrir lífið“

„Markmiðið er að undirbúa nemendur fyrir lífið“