Umtalið er okkar besta auglýsing – segja eigendur Bara Bistró í Borgarnesi

Það sem hófst sem hugmynd um einfaldan bar í Borgarnesi hefur á fimm árum þróast í veitingastað með sífellt fjölbreyttari starfsemi. Hjónin Hlynur Þór Ragnarsson og Sóley Ósk Sigurgeirsdóttir reka Bara Bistro, áður „Bara Ölstofa Lýðveldisins,“ og hafa undanfarin ár byggt staðinn jafnt og þétt upp. Þau leggja áherslu á persónulega þjónustu, íslenskt hráefni og samstarf við fyrirtæki í nærsamfélaginu. Góðar umsagnir gesta á netinu hafa síðan orðið þeim öflugri auglýsing en nokkur keypt herferð. „Við þurfum bara að vinna vinnuna okkar vel,“ segir Sóley.

Hlynur er frá Hólmavík á Ströndum en Sóley er fædd og uppalin í Borgarnesi. Þau bjuggu um tíma í Noregi en fluttu aftur heim til Íslands þegar heimsfaraldurinn skall á. Þau keyptu húsnæðið í Borgarnesi í desember 2020 ásamt systur Sóleyjar, Rakel Dögg og eiginmanni hennar Magnúsi Birni Jóhannssyni, og hófust fljótlega handa við framkvæmdir. Ölstofan var síðan opnuð 17. júní 2021. Til að byrja með voru bæði hjónin í öðrum vinnum samhliða þessu ævintýri, en Covid tímabilið reyndist þeim erfitt og þá var gott að hafa örugga vinnu, enda litlar sem engar tekjur að hafa upp úr rekstrinum á þeim tíma. „Okkur fannst einfaldlega vanta bar í Borgarnesi,“ segir Hlynur. Eins og honum er lagið fylgir skýringunni smá glott. Á fyrstu stigum sögðu þau forvitnum Borgnesingum ýmist að þarna ætti að opna vídeóleigu eða hjólaverkstæði. Að lokum varð þó einfaldasta hugmyndin ofan á. „Þetta verður bara bar,“ segir Hlynur.

**Bara Bistró er fagurlega skreytt hús að Brákarbraut 3 í Borgarnesi**

Nafnið á staðnum lifði sínu eigin lífi

Staðurinn hét upphaflega Ölstofa lýðveldisins og áherslan var meðal annars á bjór frá smærri framleiðendum. Borgnesingar tóku þó fljótt að kalla staðinn einfaldlega „Bara bar“ og nafnið festist. „Við höfum reyndar aldrei verið bara bar,“ segir Sóley. „Fólk kemur enn inn og spyr hvort við séum með mat.“ Síðar varð Bara Bistro meira einkennandi nafn fyrir starfsemina og þar er meðvitað leikið með orðið „bara“. Hlynur segir þau hafa haft ýmsar hugmyndir um nafn á staðinn á leiðinni og húmorinn hafi aldrei verið langt undan. Bara Ölstofa Lýðveldisins hafi á sínum tíma verið skammstöfun fyrir orðið BÖL, sem er tilvísun í að öl geti stundum verið böl. En þótt léttleikinn einkenni hjónin er metnaðurinn í rekstrinum augljós. Þegar þau hafi hellt sér út í reksturinn hafi það verið mjög krefjandi að sinna öðrum vinnum samhliða rekstri. Það hafi ekki gengið og þau því látið slag standa og stigið skrefið til fulls með fyrirtækið.

Ólst upp við þjónustu

Hvorugt þeirra er menntaður matreiðslumaður en bakgrunnurinn í þjónustu og veitingarekstri er þó sterkur. Hlynur ólst upp á Hólmavík þar sem hótelrekstur var hluti af daglegu lífi hans. Í Noregi kom hann jafnframt að uppbyggingu veitingastaða, þótt þar hafi hann meðal annars starfað sem pípari og komið að hönnun og framkvæmdum sem slíkur. Sóley kemur úr þekktri bakarafjölskyldu í Borgarnesi. „Pabbi minn er Geiri bakari þannig að við systurnar ólumst upp í þessu þjónustuumhverfi. Fjölskyldurekstur, þjónusta og það að taka vel á móti fólki hefur alltaf verið hluti af okkar lífi.“ Þessi bakgrunnur virðist hafa fylgt þeim inn í Bara Bistro. Markmiðið er að gesturinn upplifi ekki aðeins góðan mat heldur einnig hlýjar móttökur.

**Suman Tamang, starfsmaður í sal, er ein af ómetanlegum starfsmönnum Bara Bistró**

Gesturinn á að finna að hann sé velkominn

Hlynur segir fyrstu augnablikin skipta miklu máli þegar gestur stígur inn fyrir dyrnar. „Við leggjum rosalega mikið upp úr því að þegar fólk grípur í hurðarhúninn sé einhver tilbúinn að taka á móti því. Ef við höfum ekki tíma strax látum við samt vita að við komum eftir smástund.“Sóley segir þau frá upphafi hafa viljað skapa afslappað andrúmsloft þar sem fólki liði eins og það væri að heimsækja ættingja eða gamla vini. „Þú átt að koma inn og líða vel. Við tökum vel á móti fólki og viljum einfaldlega veita góða þjónustu.“ Hlynur segir heildarupplifunina ekki síður mikilvæga en matinn sjálfan. „Auðvitað reynum við að gera eins góðan mat og við getum. En þetta snýst líka um upplifunina. Við viljum að fólk komi aftur – og ef það kemur ekki sjálft aftur, þá segi það vonandi einhverjum öðrum að það sé þess virði að stoppa hér.“

Umsagnirnar draga ferðamenn inn í bæinn

Þessi hugsun sem þau hjón lýsa virðist hafa skilað sér. Bara Bistro hefur fengið góðar umsagnir á Google og Tripadvisor og hjónin segja þær hafa gríðarlega þýðingu, ekki síst fyrir erlenda ferðamenn. „Þetta gerir alveg lygilega hluti fyrir okkur,“ segir Sóley. Hún bendir á að ferðafólk sem kemur sunnan frá beygi ekki sjálfkrafa inn í Borgarnes. Góðar umsagnir á netinu geti hins vegar orðið til þess að fólk ákveði sérstaklega að stoppa.

Hlynur segir þau lítið hafa lagt upp úr hefðbundnum auglýsingum. „Það er miklu betri auglýsing fyrir okkur að þú segir öðrum hvað við séum frábær en að ég sé sjálfur að reyna að sannfæra alla um það. Við höfum í rauninni aldrei keypt auglýsingar. Umtalið er auglýsingin.“ Sumir erlendir gestir hafa meira að segja snúið aftur eftir eitt eða tvö ár og óskað eftir sama réttinum og þeir fengu í fyrri heimsókn.“

**Heimskort hangir á vegg inni á staðnum, en erlendum gestum er boðið að stinga prjón á þann stað sem þeir koma frá. Þarna gefur að líta aragrúa af gestum víða úr heiminum**

Frá pylsum og kjúklingavængjum í eigin matseðil

Matur hefur verið í boði frá upphafi en matseðillinn hefur tekið miklum breytingum. „Við byrjuðum með alls konar; pylsur og kartöflur, kjúklingavængi, blómkál og ýmislegt annað,“ segir Sóley. Smám saman þróaði Hlynur matseðil sem þau segja hafa slegið í gegn síðustu þrjú ár. Með stækkun staðarins hefur síðan skapast meira svigrúm til að þróa matinn enn frekar.

Í hádeginu er lögð áhersla á heimilislegan mat en á öðrum tímum er lambakjöt áberandi. Hlynur segir ákveðna hugsun liggja að baki hráefnisvalinu. „Við getum ræktað kind og hest á Íslandi án þess að vera jafn háð innfluttu korni og með ýmsar aðrar búfjártegundir. Þess vegna höfum við horft mikið til þessara afurða.“ Lambið er fyrirferðarmikið á matseðlinum. Þau útbúa meðal annars sína eigin lambaborgara og leggja áherslu á að gera sem mest frá grunni. „Við gerum okkar eigið hrásalat, okkar eigin sósur og reynum að gera þetta sjálf. Það er auðvitað hægt að kaupa allt tilbúið, en ef maður vill ferskleika og sérstöðu þarf maður að leggja vinnu í þetta.“

Heimilismatur í hádeginu

Eftir að staðurinn fór að opna fyrr á virkum dögum hefur hádegisverður orðið stærri hluti starfseminnar. Þá hafa meðal annars iðnaðarmenn í Borgarnesi farið að venja komur sínar. Á borðum getur verið hefðbundinn íslenskur matur en einnig lasagna, fiskur og aðrir réttir. Hlynur segir þau gjarnan sækja í mat sem minni á það sem fólk þekkir að heiman.

Samhliða þessu leggja þau áherslu á að kaupa hráefni úr nærumhverfinu þegar kostur er. Kjöt kemur meðal annars frá Sláturfélagi Vesturlands í Brákarey og þau hafa unnið að því að fá fisk reglulega frá Skagafiski á Akranesi. Grænmeti sækja þau einnig til ræktenda eins nálægt og mögulegt er, að megninu til frá Kleppjárnsreykjum. „Gúrka sem hefur aldrei farið í kæli er bara betri gúrka,“ segir Hlynur.

Heiðurinn af listaverkinu á Bara Bistró á Lucy Nikishina, úkraínsk kona sem bjó í Borgarnesi, en er nýlega flutt á Akranes. Eftir hana liggja stórkostleg málverk á húsum víða um land. Myndin var tekin fyrir þremur árum þegar Lucy lauk við þessa blómlegu skreytingu. Ljósm. úr safni Skessuhorns/ mm

Vilja byggja aðra upp með sér

Samstarf við önnur fyrirtæki er rauður þráður í máli þeirra. Þau líta ekki endilega á aðra veitingastaði og gististaði í Borgarnesi sem beina samkeppnisaðila. „Við erum öll að gera sitthvorn hlutinn og meira verður bara meira,“ segir Hlynur. Hann nefnir meðal annars Hótel Vesturland, Hótel Borgarnes, Landnámssetrið, Kaffi Kyrrð, Englendingavík og Þúfuna. „Það er raunverulegur vinskapur á milli okkar. Ef þau vantar eitthvað erum við til staðar og ef okkur vantar eitthvað vitum við hvert við getum leitað.“ Sóley segir þau jafnframt passa upp á að fara ekki markvisst inn á sérsvið annarra staða. Þegar þau fóru til dæmis að huga að eftirréttum ákváðu þau frekar að leita samstarfs við Geirabakarí. „Við erum lítil batterí hvert fyrir sig,“ segir Hlynur. „En ef við náum að vinna saman getum við byggt hvert annað upp.“

Ferðaþjónustan skiptir Borgarnes miklu

Hlynur telur mikla möguleika felast í auknum ferðamannastraumi um Vesturland. Þjónustustigið í Borgarnesi sé hátt miðað við stærð samfélagsins og það sé að stórum hluta vegna þess fjölda ferðamanna sem fer um bæinn. „Við verðum bara að standa okkur svo ferðamennirnir stoppi. Ferðaþjónustan á Vesturlandi er að aukast og þegar orðið er mjög þétt í öðrum landshlutum, líkt og á Selfossi sem dæmi, skapast tækifæri hér.“ Borgarnes sé í alfaraleið en það eitt tryggi ekki að fólk stoppi. Þjónustan þurfi að vera þess virði að leggja lykkju á leið sína.

Grímshús orðið viðburðastaður

Hjónin eru með fleiri járn í eldinum. Þau reka einnig viðburðastarfsemi í Grímshúsi niðri við höfnina í Borgarnesi. Húsið á sér sérstaka sögu. Bæjarbúar komu á sínum tíma að endurbótum þess með fjárframlögum og sjálfboðavinnu og leggja Hlynur og Sóley áherslu á að sá þáttur gleymist ekki. Þegar þau tóku við húsinu hafði það lítið verið nýtt um árabil. Áður en húsið var gert upp hafi meira að segja staðið til að rífa það. Eftir að þau tóku við húsinu bættu þau aðstöðuna og hafa síðan byggt þar upp fjölbreytta viðburðastarfsemi. „Það er búið að gifta á sviðinu og skíra þar,“ segir Sóley. „Við höfum verið með uppistand, tónleika, fermingar og starfsmannaveislur.“ Þar hafa einnig verið haldnar hátíðir á vegum Bara Bistro og hefur Grímshús þannig orðið viðbót við reksturinn í miðbænum.

**Suman Tamang sinnir gestum sem létu vel af þjónustunni og staðnum**

Fjölskyldureksturinn verður að koddaspjalli

Að reka veitingastað saman getur verið krefjandi fyrir hjón. Hlynur hefur staðið vaktina í rekstrinum frá upphafi en Sóley starfaði lengi samhliða sem kennari. Hún er nú í leyfi frá kennslunni og tekur meiri þátt í daglegum rekstri. „Eftir að við fórum að hafa opið allan daginn finnst mér þetta bara æðislega skemmtilegt. Þetta er mín ástríða líka. Við erum alltaf að prófa okkur áfram og það er svo gaman að taka á móti fólki og reiða fram góðan mat.“

Reksturinn fylgir þeim þó heim. „Ég ólst upp í fjölskyldufyrirtæki og þetta er bara það sem er talað um. Þetta er okkar koddahjal,“ segir Sóley og hlær. Þau eiga fjögur börn saman og fjölskyldulífið og reksturinn fléttast því óhjákvæmilega saman. „Þetta er mikil vinna og miklar pælingar,“ segir Sóley. „En þetta er skemmtilegt. Annars værum við ekki að þessu,“ bætir Hlynur við og brosir.

Húsið sjálft orðið hluti af upplifuninni

Það er erfitt að fara fram hjá Bara Bistro. Húsið hefur verið skreytt litríkum myndum sem úkraínska listakonan Lucy málaði. Hún bjó áður skammt frá staðnum en hefur nú flutt á Akranes. „Við báðum hana sérstaklega um að mála húsið okkar og það vekur alveg athygli,“ segir Hlynur. Listaverkið heldur síðan áfram þegar gengið er inn og þar leynast vísanir í Sóleyju og Hlyn sjálf. „Þetta er aðeins öðruvísi,“ segir Hlynur. Og hann sér meira að segja kost við hið margumtalaða borgfirska veður. „Það er ekkert alltaf sól í Borgarnesi og það er sólin sem eyðileggur málninguna. Það kemur eiginlega aldrei sól á þessa hlið hússins, þannig að þetta ætti að vera í fínu standi næstu tuttugu árin,“ segir hann og hlær.

„Við höldum áfram“

Þegar talið berst að framtíðinni er greinilegt að hvorugt þeirra telur verkefnið fullmótað. Reksturinn hefur breyst mikið á aðeins fimm árum og þau vilja halda áfram að þróa hann. „Við höldum áfram,“ segir Hlynur. „Maður finnur formúlu sem virkar en heldur samt áfram að prófa eitthvað nýtt. Ef eitthvað er nógu gott þá fær það að vera áfram. Þetta er ofboðslega skemmtilegt.“

Sóley tekur undir og segir þau fyrst og fremst þakklát fyrir móttökurnar í Borgarnesi, gestina sem koma aftur og aftur, og starfsfólkið sem hefur staðið með þeim. „Við erum með alveg frábært starfsfólk og margir hafa verið með okkur frá fyrsta degi. Fólk hefur hlaupið undir bagga þegar þess hefur þurft og við erum rosalega þakklát fyrir hvernig tekið hefur verið á móti okkur.“

Á vegg staðarins er kort þar sem erlendir gestir geta merkt hvaðan þeir koma. Punktarnir dreifast víða um heim og Sóley segir alltaf jafn gaman að sjá hvernig lítill veitingastaður í Borgarnesi hefur náð til fólks úr ólíkum áttum. Það sem hófst sem einföld hugmynd um að opna bar er því orðið talsvert meira. Ölstofan varð Bara Bistro, matseðillinn stækkaði, húsnæðið sömuleiðis og við bættist viðburðastarfsemi í Grímshúsi, ásamt eigin vefsíðu – barabistro.is. Eitt hefur þó haldist óbreytt frá upphafi; gesturinn á að finna að hann sé velkominn, segja hjónin að lokum.

**Hlynur og Sóley í hliðarsal sem er ný viðbót og gerir þeim kleift að taka á móti 40 til 50 gestum**

Frá ölstofu í bistró

Umtalið er okkar besta auglýsing – segja eigendur Bara Bistró í Borgarnesi

Umtalið er okkar besta auglýsing – segja eigendur Bara Bistró í Borgarnesi