Hannesarsteinn við Stykkishólmsveg verður færður af núverandi stað vegna umfangsmikilla endurbóta á veginum. Steinninn stendur við afleggjarann að kirkjugarðinum og Nýrækt en ný veglína liggur yfir núverandi staðsetningu hans.

Framkvæmdir við Stykkishólmsveg hófust í lok apríl og eru nú langt komnar. Vegagerðin stendur fyrir verkinu sem nær yfir um 3,4 kílómetra kafla. Vegurinn er breikkaður og styrktur, ræsi endurnýjuð og lagt nýtt bundið slitlag. Að framkvæmdum loknum verður vegurinn átta metra breiður, með tveimur 3,5 metra akreinum og hálfs metra öxlum.

Samhliða framkvæmdunum verður veglínunni hnikað lítillega til á köflum. Vegna þess þarf Hannesarsteinn að víkja tímabundið svo ljúka megi framkvæmdum. Gert er ráð fyrir að honum verði síðar fundinn endanlegur staður þegar hönnun nýs göngustígs með fram veginum liggur fyrir. Einnig þarf að færa girðingar fjær veginum á nokkrum stöðum vegna breikkunarinnar og breytinga á veglínu. Það verður gert af Vegagerðinni í samráði við landeigendur og umráðamenn viðkomandi lands.

Hannesarsteinn dregur nafn sitt af Hannesi Hannessyni, jafnan nefndum Hannesi stutta, sem var kunnur hagyrðingur í Breiðafjarðarbyggðum og víðar. Um Hannes og sögu hans má meðal annars lesa í bókinni „Sögur úr Helgafellssveit og nágrenni“ eftir Hönnu Jónsdóttur.

Hannesarsteinn dregur nafn sitt af Hannesi Hannessyni, jafnan nefndum Hannesi stutta, sem var kunnur hagyrðingur í Breiðafjarðarbyggðum og víðar. Ljósm. Sveitarfélagið Stykkishólmur.

Hannesarsteinn færður vegna framkvæmda við Stykkishólmsveg