Víkingur Ólafsvík lauk keppni í 2. deild karla í knattspyrnu með glæsibrag þegar liðið vann öruggan 4:0 sigur á KFA á Ólafsvíkurvelli laugardaginn 12. september. Leikið var í fallegu og sólríku haustveðri og skartaði Ólafsvíkurvöllur sínu fegursta.

Björn Henry Kristjánsson kom Víkingi á bragðið á 23. mínútu og Ingvar Freyr Þorsteinsson tvöfaldaði forystuna á 55. mínútu. Heimamenn höfðu góð tök á leiknum og KFA átti fá svör við öflugum leik Víkings. Undir lokin bættu heimamenn svo um betur. Gabríel Þór Þórðarson skoraði þriðja markið á 81. mínútu og aðeins þremur mínútum síðar rak Asmer Begic smiðshöggið á sigurinn með fjórða marki Víkinga. Lokatölur því 4:0.

Víkingur Ólafsvík lýkur tímabilinu í fimmta sæti 2. deildar með 31 stig, jafnmörg og Dalvík/Reynir sem hafnaði í fjórða sæti, en hafði hagstæðari markatölu. Haukar urðu deildarmeistarar með 47 stig og Selfoss fylgir þeim upp um deild eftir að hafa tryggt annað sætið með 45 stigum. Kári frá Akranesi veitti Selfyssingum harða keppni um sætið en endaði í þriðja sæti með 42 stig, þrátt fyrir stórglæsilegan 4:0 sigur á Haukum í lokaumferðinni.

Liðsmynd af Víkingi Ó á Ólafsvíkurvelli í fallegu haustveðri.

Víkingur Ó lauk tímabilinu með stórsigri