Fornleifafræðingurinn Atli Freyr Guðmundsson verður með þriggja erinda fyrirlestraröð um fornleifar, víkinga og menningararf Dalanna í Auðarstofu í Búðardal í haust. Fyrsta erindið verður miðvikudaginn 16. september og síðan taka við tveir fyrirlestrar í október.

Fyrsta erindið, Gripir víkinganna, verður haldið miðvikudaginn 16. september. Þar mun Atli Freyr fjalla um gripi frá víkingaöld, allt frá vopnum og skartgripum til hversdagslegra muna sem gefa innsýn í líf og handverk fólks á þessum tíma. Meðal annars verður skoðað hvað gripirnir segja um viðskipti, tækni og tengsl víkinga við aðrar þjóðir. Eftirlíkingar af ýmsum gripum verða jafnframt látnar ganga á milli gesta.

Annar fyrirlesturinn; Hestar víkinganna verður fimmtudaginn 8. október og fjallar um íslenska hestinn og tengsl hans við víkinga. Þar verður rýnt í hvernig hesturinn barst hingað með landnámsmönnum og varð fljótt ómissandi þáttur í daglegu lífi. Einnig verður fjallað um hlutverk hans í goðafræði, greftrunarsiðum og trúarlífi til forna.

Fyrirlestraröðinni lýkur fimmtudaginn 22. október með erindinu Fleiri fornleifar í innkeyrslunni. Þar beinir Atli Freyr sjónum að fornleifum í Dölum en sýslan er auðug af sögu og þar má víða finna áþreifanlegar minjar um búsetu fyrri alda. Erindið er framhald af fyrri umfjöllun hans um sama efni og verður meðal annars fjallað um mikilvægi þess að þekkja og varðveita fornleifar sem hluta af menningararfi þjóðarinnar.

Erindin verða haldin í Auðarstofu, Nýsköpunar- og fræðasetri Dalabyggðar að Miðbraut 11 í Búðardal. Einnig verður hægt að fylgjast með þeim í gegnum „Teams“ en skráning fer fram með tölvupósti á linda@ssv.is

Víkingagripir, íslenski hesturinn og fornleifar í Dölum