Ráðstefnan Gull á grunnsævi haldin á Akranesi

Hanna Katrín Friðriksson atvinnuvegaráðherra hyggst í haust mæla fyrir nýju frumvarpi til laga um stórþörungarækt í sjó. Frumvarpinu er ætlað að skapa skýran lagaramma utan um atvinnugrein sem enn er ung hér á landi en talsverðar væntingar eru bundnar við. Ráðherra greindi frá þessu í opnunarræðu sinni á ráðstefnunni Gull á grunnsævi sem haldin var í Breið nýsköpunarsetri á Akranesi síðdegis í gær.

Hanna Katrín sagði áhuga á stórþörungarækt fara vaxandi og ýmsar tilraunir þegar standa yfir. Núgildandi regluverk væri hins vegar ekki sérstaklega sniðið að starfseminni og því væri þörf á skýrari umgjörð. „Markmið frumvarpsins er að koma á skýrum, fyrirsjáanlegum og skilvirkum lagaramma sem styður við rannsóknir, þróun og atvinnuuppbyggingu, á sama tíma og tryggt er að ræktun fari fram með ábyrgum hætti,“ sagði Hanna Katrín.

Rannsóknar- og rekstrarleyfi

Í máli ráðherra kom fram að í frumvarpinu verður gert ráð fyrir bæði rannsóknar- og rekstrarleyfum. Hún sagði mikilvægt að skapa svigrúm til að prófa nýjar aðferðir, afla gagna og byggja upp þekkingu áður en ráðist væri í umfangsmeiri rekstur. Rekstrarleyfi þyrftu jafnframt að byggja á skýrum skilyrðum, meðal annars um staðsetningu ræktunar, búnað og ræktunarefni, auk vöktunar, upplýsingaskila og frágangs. Hanna Katrín lagði jafnframt áherslu á að haf- og strandsvæði væru sameiginlegt rými þar sem margir og ólíkir hagsmunir mættust. Þar nefndi hún meðal annars siglingar, fiskveiðar, fiskeldi, náttúruvernd, ferðaþjónustu og útivist. „Allt þetta þarf að hafa í huga og sníða umgjörð utan um greinina sem styður við framþróun hennar,“ sagði ráðherra.

Kallar eftir samráði við greinina

Hanna Katrín lagði áherslu á að stjórnvöld ættu gott samtal við þá sem þegar starfa á þessu sviði og sagði þekkingu þeirra mikilvæga við lokavinnslu frumvarpsins. „Þið sem hér eruð þekkið tækifærin, hindranirnar og tæknilegu úrlausnarefnin,“ sagði hún og bætti við að samráð skipti miklu við endanlega mótun frumvarpsins og þeirra reglna sem kynnu að fylgja í kjölfarið.

Á ráðstefnunni Gull á grunnsævi komu saman forsvarsmenn fyrirtækja, félagasamtaka og aðrir sem tengjast nýtingu sjávarauðlinda. Í erindum dagsins var meðal annars fjallað um þau tækifæri sem kunna að felast í ræktun og nýtingu stórþörunga. Þeir geta orðið hráefni í fjölbreytta framleiðslu, meðal annars matvæla, fæðubótarefna, fóðurs og lyfja. Ráðstefnan fór fram í Breið nýsköpunarsetri á Akranesi og var þar sjónum sérstaklega beint að möguleikum til frekari uppbyggingar þessarar ungu atvinnugreinar hér á landi.

Ný lög um stórþörungarækt boðuð í haust

Ráðstefnan Gull á grunnsævi haldin á Akranesi

Ráðstefnan Gull á grunnsævi haldin á Akranesi