Skagahljómsveitin Amma og Úlfarnir blæs til tónleika í Tónbergi á Akranesi föstudagskvöldið 4. september. Yfirskrift þeirra er Óskalög sjómanna og hefjast tónleikarnir kl. 20. Amma og Úlfarnir eiga sér langa sögu í tónlistarlífi á Akranesi og hafa í gegnum tíðina komið fram við ýmis tækifæri í bænum. Sveitin er þekkt fyrir líflegan flutning á alþýðu- og dægurlögum þar sem leikgleðin er jafnan í fyrirrúmi.

Á tónleikunum í Tónbergi verður boðið upp á vel valin lög undir yfirskriftinni Óskalög sjómanna. Jónína Björg Magnúsdóttir verður söngkona kvöldsins en hljómsveitina skipa Flosi Einarsson, Eðvarð Lárusson, Guðjón Jósef Baldursson, Hallgrímur Guðsteinsson og Linda Guðmundsdóttir.

Amma og Úlfarnir eiga jafnframt athyglisverðan sess í tónlistarsögu Skagamanna. Eitt eftirminnilegasta verkefni sveitarinnar var í september 1992 þegar hún hitaði upp fyrir bresku rokksveitina Jethro Tull á tónleikum í Íþróttahúsinu við Vesturgötu á Akranesi. Síðan hefur sveitin reglulega komið saman og meðal annars komið fram í tengslum við bæjar- og menningarhátíðir á Skaganum. Tónleikarnir á föstudagskvöld hefjast kl. 20 og standa til kl. 22. Miðar eru seldir í Pennanum Eymundsson á Akranesi og kostar miðinn 5.000 krónur.