Ákveðið hefur verið að loka Omnis Verslun við Dalbraut á Akranesi. Ingþór Bergmann Þórhallsson eigandi segir mikinn samdrátt í sölu ástæða þessarar ákvörðunar en útslagið hafi þó gert að Síminn (Ásar hf.) hafi sagt upp þjónustusamningi við verslunina, en sú þjónusta hafi frá upphafi verið ákveðin kjölfesta í rekstrinum. Búið er að segja upp húsaleigu en versluninni verður endanlega lokað föstudaginn 11. september næstkomandi en síðasti dagur þjónustu við Símann er mánudagurinn 31. ágúst. Ingþór segir í samtali við blaðamann Skessuhorns að ekki verði útsala í versluninni dagana fyrir lokun. Hann mæti góðum skilningi birgja sem taka óseldar vörur til baka. Félagið hefur samhliða versluninni rekið netverslunina simahulstur.is og verður því framhaldið á nýjum stað.

Umhugsunarefni

„Ástæðan fyrir lokun verslunarinnar er m.a. uppsögn á þjónustusamningi Símans á Akranesi. Sú þjónusta hefur verið ákveðið undirstaða í okkar rekstri. Nú ákveður Síminn að hætta þessari þjónustu við íbúa á Akranesi en búnaður frá þeim verður til afhentingar í afgreiðslu Íslandspósts líkt og verið hefur. Ekki má búast við ráðgjöf og frekari þjónustu þar líkt og verið hefir hér.“ Ingþór segir efnahagsástand þungt um þessar mundir og það hafi leitt til mikils samdráttar í sölu. „Við erum einnig í gríðarlegri samkeppni við verslun á höfuðborgarsvæðinu og þá eru nýir tímar í netverslun sem leitt hefur til öðruvísi kauphegðunar almennings. Allt þetta hafi áhrif. Engu að síður er það umhugsunarefni í stækkandi og tæplega níu þúsund manna bæjarfélagi að verslun af þessu tagi skuli ekki þrífast. Ég vona bara að íbúar á Akranesi horfi sér nær þegar svona gerist. Til þess að verslun og þjónusta þrífist í bænum þá þarf að eiga viðskipti við hana,“ segir Ingþór.

Öll óvissa slæm

Omnis verslun hefur verið rekin á Akranesi frá árinu 2007 en Ingþór og eiginkona hans Jóhanna Sigurvinsdóttir keyptu reksturinn 2015. „Við erum í raun raftækjaverslun, en seljum einnig búsáhöld og ýmislegt sem íbúar hafa bæði leitað að og kallað eftir. Við höfum reynt eftir fremsta megni að panta fyrir fólk og fengið þá annað hvort samdægurs eða daginn eftir. Þá höfum við alltaf reynt að vera með það nýjasta, í tölvum eða símum, og lagt áherslu á að þjónusta farsímanotendur. Þótt við höfum aðlagað verslunina að þörfum íbúa dugar það ekki til. Það sem gerði þó útslagið með þessa ákvörðun var uppsögn Símans á þjónustusamningi við okkur.“ Ingþór segir að rekstur sem þessi sé mjög viðkvæmur og finni vel fyrir stöðu í efnahagsmálum og þá sé öll óvissa slæm. Nefnir hann bæði kosningar og nú ESB umræðuna sem dæmi um aðstæður sem skapa óvissu. Óvissan skapi samdrátt í neyslu almennt. „Það er því í mörg horn að líta ef finna á ástæður fyrir því að við leggjum árar í bát núna. Vonir okkar voru að tíminn myndi vinna eitthvað með okkur en efnahagur landsins er bara ekki að þokast í rétta átt.“

Ingþór og Ragnar Fjalar Þrastarson sölustjóri, sem hafa staðið vaktina í versluninni í rúm 11 ár, eru engu að síður þakklátir. „Við viljum nota tækifærið og þakka bæjarbúum fyrir samfylgdina og þá sérstaklega þeim sem hafa komið hér með reglubundnum hætti og gert sín viðskipti hjá okkur ár eftir ár. Þið hafið verið hryggjarstykkið í starfseminni og gert þessa vegferð þess virði,“ segir Ingþór að lokum.

Omnis Verslun á Akranesi verður lokað