Minningarsjóður sem stofnaður var í minningu Heimis Klemenzsonar hélt síðastliðið föstudagskvöld tónaveislu í Hjálmakletti. Í upphafi kynnti Jónína Erna Arnardóttir, ein þeirra er skipa stjórn sjóðsins, dagskrá kvöldsins. Segja má að hvert og eitt atriði hafi verið einstakt.

Í upphafi söng frábær barnakór, Æskukórinn, undir stjórn Theodóru Þorsteinsdóttur. Síðan rak hvert atriði annað. Frænkur Heimis þær Ása og Emma sungu nokkur lög, ungur og upprennandi trúbator, Guðbrandur Örn, söng eigin lög og ljóð, Saga Garðars skemmti með uppstandi og Snorri Helgason flutti sín bestu lög. Magni Ásgeirsson var líflegur í söng og spjalli, en næst á svið voru Jón Ólafsson og Hildur Vala, sem flutt okkur góðar perlur. Síðasta atriði kvöldsins var söngur Æskukórsins ásamt Jóni Ólafs og Hildi Völu og fluttu þau lagið Flugvélar við mikinn fögnuð viðstaddra.

Stofnskrá minningarsjóðsins kveður á um að styrkja skuli ungt og upprennandi tónlistarfólk til áframhaldandi menntunar. Að þessu sinni hlutu styrk úr sjóðnum þeir Guðbrandur Örn Úlfarsson, Bjarni Freyr Gunnarsson og Gunnar Árni Heiðarsson miklir tónlistarmenn sem við væntum mikils af í framtíðinni.

Þakka ber nefndarfólki sjóðsins fyrir þeirra miklu vinnu. Svona viðburður kostar vinnu og góðan undirbúning. Þá má geta þess að allir sem fram komu gáfu vinnu sína. Tökum þau til fyrirmyndar. Út í kvöldið svifu ungir sem aldnir brosandi eftir hreint frábært kvöld.

Flemming Jessen

**Þessir fengu styrk frá Minningarsjóðnum; Gunnar Árni Hreiðarsson, Bjarni Freyr Gunnarsson og Guðbrandur Örn Úlfarsson**

Vel heppnaðir tónleikar og frábær skemmtun