Kristín Þórðardóttir hefur verið skipuð í nýtt embætti sýslumanns. Hún tók við stöðunni í síðustu viku. Frumvarp dómsmálaráðherra um sameinað embætti sýslumanns var samþykkt á Alþingi í febrúar síðastliðnum. Með lögunum verða núverandi níu sýslumannsembætti sameinuð í eitt embætti sýslumanns frá og með 1. janúar næstkomandi. Þá verður landið eitt umdæmi með starfsstöðvar um land allt. Frá því lögin voru samþykkt hefur farið fram mikill undirbúningur í dómsmálaráðuneytinu til að tryggja að sameiningin gangi vel fyrir sig. Verkefnið er viðamikið, enda eru í dag 255 stöðugildi á 27 starfsstöðvum sýslumannsembættanna um land allt.